СтIал Сулейманан райондин администрацияда сергьятар хуьдайбурун управленидин делегацияди СВО-да телеф хьайи военный рекьяй къуллугъчидин хизандив «Жуьрэтлувиляй» орден вахкана.
Гьукуматдин шабагь вахкун патал райондиз, кьиле контр-адмирал Алексей Алексеев аваз, Россиядин ФСБ-дин сергьятар хуьдайбурун управленидин делегация атанвай.
Россиядин ФСБ-дин сергьятар хуьдайбурун Брянксдин областда авай управленида икьрардин бинедаллаз къуллугъ кьиле тухузвай Кьулан СтIалдилай тир 24 йисан яшда авай Мадрид Османов, уьлкведин сергьятар хуьдайла, телеф хьана. Ватан хуьдайла, чандилайни гъил къачуна, къалурай игитвиляй адаз (кьейидалай кьулухъ) «Жуьрэтлувиляй» орден гана.
Алексей Алексеева шабагь Мадридан диде-бубадив вахкана, абурун тIварунихъ разивилин келимаяр лагьана, Ватан хуьнин кардик абурун хци лайихлу пай кутунвайди къейдна.
Мадрид, адан халис ватанпересвал, викIегьвал, райондин кьил Саид Темирханова къейд авурвал, ватанэгьлийрин рикIера гьамишалугъ амукьда.
— Мадрид Османов вичин къаматдиз чна дериндай гьуьрмет авуниз ва чи рикIера гьамишалугъ амукьуниз лайихлу я. Адан ватанпересвал, Ватандиз вафалувал сергьятар хуьдайбурун цIийи са шумуд несилар патал чешне жеда. Военный рекьяй чи вири къуллугъчийрихъ заз мягькем сагъламвал хьана кIанзава, къуллугъ кьилиз акъудунин карда хатасузвал хьун алхишзава, — алава хъувуна Саид Темирханова.
Администрациядин ва райондин жемятдин патай ада кьегьал ватанэгьлиди уьлкведин хатасузвал хуьник пай кутуниз виниз тир къимет гунай сергьятар хуьдайбурун управленидин къуллугъчийриз сагърай лагьана. Къейд ийин, идалай вилик, сергьятар хуьдайбурун управлениди кьил кутуналди, Мадрид Османован экуь къамат рикIел хуьнин лишан яз, сергьят хуьдай «Ярагъ-Къазмаяр» заставадал чи ватанэгьлидин тIвар кхьенвай кьул ачухнай.
Чи мухбир
