Алукьзавай йисуз чпин хуьрера мобильный алакъа ва интернет патал бинедин станцияр эцигун патал тахминан 1000 кас дагъустанвийри сесер гана. ИкI, виридалайни активнидаказ и серенжемда ЦIунти, СтIал Сулейманан ва Унцукул районрин агьалийри иштиракна. РД-дин рекъемрин рекьяй виликди финин министерстводи сесер кьабулун 17-ноябрдалди давамарда.
Икьван чIавалди сесер гайибурун кьадардиз килигна, къведай йисуз бинедин станцияр эцигдай 10 хуьруьн сиягьда гьатнава: Хибиятли, Агъа Хъартас, Моксох, Тлянуб, Гараколоб, Ахтини, Янгылбай, Уй-Салтан, Вициятли ва Штул. Тамам сиягь «Госкъуллугърин» сайтдай жагъида — ина квевайни сес гуз жеда. Анжах и кар патал сес гузвай кас прописка авунвай региондай хьун лазим я.
Дагъустандин рекъемрин рекьяй виликди финин министерстводи агьалийриз гьакI маса серенжемдани иштиракуниз эвер гузва. ИкI, 15-ноябрдилай 15-декабрдалди министерстводин сайтдин куьмекдалди агьалийривай идаради ришветбазвилин вилик пад кьун патал тухузвай кIвалахдиз къимет гуз жеда.
Жасмина Саидова
