12-13-сентябрдиз Дербент райондин Чинар хуьр Кьиблепатан Дагъустандин спортдин центрадиз элкъвена. Ина Дагъустандин Кьил Сергей Меликован призар патал мини-футболдай Кьиблепатан Дагъустандин районрин командайрин арада акъажунар кьиле фена. Мярекатда иштиракай гьуьрметлу мугьманрин арада РД-дин Халкьдин Собранидин депутат, сиясатдинни жемиятдин деятель Имам Яралиев, Дербент райондин кьил Мавсум Рагьимов, Ахцегь райондин кьил Абдул-Керим Палчаев, РД-дин Халкьдин Собранидин депутат Асият Алиева, Табасаран райондин кьил Мегьамед Къурбанов, «ТАСС Кавказ» региондин информациядин центрадин регьбер Низами Гьажибалаев, сад лагьай каналдин военкор Фарид Муслимов ва масабур авай.
Турнирдиз гьазурвилер вини дережада аваз акунвай. Ам бажарагълу спортсменарни Кьиблепатан Дагъустандин болельщикар сад ийизвай халисан сувариз элкъвена.
Чинар хуьруьз гьахьзавай рехъ тирвал, турнирдин мугьманарни иштиракчияр къаршиламишиз, ша, буюр лугьуз, мярекат кьиле физвай спортдин мектебдал кьван рехъ къалурзавай экуь лишанар куьрсарнавай.
Турнир гатlундалди, чlехи майдандал Дагъустандин спортсменри дзюдоистри, юкьварар кьадайбуру, боксерри ва теннисистри мугьманриз чпин алакьунар къалурна.
Спортдин майдандин патав мугьманар райондин 12 хуьруьн «гьаятра» милли кухнядин адетдин недай-хъвадай тIуьнриз килигна, иштагь авайбуру дадмишни авуна.
Спортдин мектебдин вилик мугьманар милли парталар алай рушари шуьрбет гваз кьабулна. Ахпа абур спортдин майданрал кьиле физвай мярекатриз, хуьрерин «гьаятра» милли тIуьнриз ва экспонатриз килигна.
Мярекат Мавсум Рагьимова ачухна: «Турнирдин гьуьрметлу иштиракчияр, багьа мугьманар! Муниципалитетрин гьуьрметлу регьберар! Къе чун вири патал кьетIен югъ я. Куьн ихьтин зурба турнирда кьабулиз зун шад я.
Къенин спортдин серенжемдихъ кьетIен метлеб, макьсад ава. Им халисан садвилин, дуствилин ва сагъламвилин уьмуьрдин ярж я.
Дагъустандин Кьил, женгинин генерал Сергей Алимовича чIехи Ватан хуьзвай чи алай аямдин игитриз гьикI дикъетдалди фикир гузватIа, чаз виридаз чизва. И къайгъударвал, гьелбетда, Дагъустанда спортдин гьерекат вилик тухуз ва виринра гегьеншарунизни талукь я.
Спортсменриз им чпин устадвал къалурдай хъсан майдан хьиз, и турнир гьакIни акьалтзавай несилдик руьгь кутазвай чешне я. И ва спортдин маса вакъиайри сагълам уьмуьр кечирмишуниз эвер гузва, акьалтзавай несил ватанпересар яз тербияламишиз, спорт кIанариз куьмекзава.
Заз къе иниз атанвай вири командайриз сагърай лугьуз, куьне гьахълу «женг», устадвал къалурна кIанзава. Гьелбетда, квехъ агалкьунар хьун алхишзава. Къуй къуватлуди гъалиб хьурай!»
Турнирда Дербент, Ахцегь, Докъузпара, СтIал Сулейманан, Хив, Дахадаев, Къайтагъ, Къаякент, Кьурагь, Мегьарамдхуьруьн, Рутул, Табасаран районрин ва Дербентдинни Дагъустандин Огни шегьеррин командайри иштиракна.
Къугъун кьве юкъуз давам хьана. Сад лагьай йикъан къугъунин нетижаяр агъадихъ галайбур хьана: «Кьурагь-Хив» районрин командайрин арада — гьисаб 5:1, «Рутул-Мегьарамдхуьруьн» — 6:5, «Ахцегь-Дахадаев» — 9:0, «Табасаран-Рутул» — 3:2, «Дербент-Докъузпара» районрин арада къугъунин асул вахт 2:2 гьисабдалди акьалтIна, пенальтияр ягъуналди Дербент райондин команда вилик акатна. «Дербент шегьер-СтIал Сулейманан район» — 5:1.
Ярумчух финалдиз Дербент ва Ахцегь районрин, Дербент шегьердинни Табасаран райондин командаяр акъатна.
Финалдин къугъун, тупуна кIвачI (кьуьл) эцяна, ачухунин гьуьрметдин ихтияр И. Яралиеваз ва М. Рагьимоваз гана.
3-чка патал майдандал Ахцегь ва Табасаран районрин командаяр экъечIна. Нетижада Ахцегь райондин командади гъалибвал къазанмишна, 3-чкадиз лайихлу хьана.
1-чка патал Дербент райондинни Дербент шегьердин командайрин арада финалдин къугъун турнирдин халисан безек хьана. Трибунаяр къугъуниз тамашиз атанвайбурув ацIанвай. Марф къваз гатIуннатIани, вири эхирдалди къугъуниз тамашна, гьар са тамашачи кьве командадизни талукь яз кIеви женгинин шагьидар хьана. ИкI, къугъуна Дербент шегьердин командади 1-чка кьуна. 2-чка — Дербент райондин командади.
КIвенкIвечи чкаяр кьур командайриз кубокар, медалар ва пулдин пишкешар гана.
Къагьриман Ибрагьимов
