2-июндиз Дагъустандиз РФ-дин просвещенидин министр Сергей Кравцов мугьман хьана. Республикадин Кьилин везифаяр вахтуналди тамамарзавай Фёдор Щукинахъ галаз санал ам яд акьалтунин нетижада зиянар хьанвай мектебрин, аялрин бахчайрин дараматар авай гьалдиз килигна ва Махачкъалада и месэладиз талукьарнавай махсус совещание кьиле тухвана.
Совещанидал хабар гайивал, Дагъустанда яд акьалтунин нетижада образованидин 130 идарадиз зиянар хьанва. Абурукай 29 объект федеральный бюджетдин такьатрихъ цIийикIа туькIуьр хъийидайвал я. Министрди къейд авурвал, и макьсадриз 1 миллиард манат пул чара авун патал РФ-дин Гьукуматди талукь къарардин проект гьазурзава.
Лагьана кIанда, образованидин ирид идара, ремонт авуртIани, арадиз хкиз жедай гьалда авач. Абурун чкадал федеральный бюджетдин такьатрихъ фад-фад хкаждай ирид дарамат эцигун ва абурун мукьварив гвай мулкар авадан авун фикирдиз къачунва.
«Лезги газет»
