Дагъустандин кьуд муниципалитетда авай тамун мулкарик цIай акатнава. Ихтилат Унцукул, Тлярата, ЦIумада районрикайни Бежта участокдикай физва.
РД-дин МЧС-дин пресс-къуллугъди 2-сентябрдиз раиж авур малуматралди, цIай кьунвай мулкарин умуми майданри саки 57 гектар тешкилзава.
1-сентябрдиз РД-дин Гьукуматдин Председатель Абдулмуслим Абдулмуслимова цIун вилик пад кьун патал кьабулзавай серенжемриз талукьарнавай совещание кьиле тухвана. Адан кIвалахда республикадин вице-премьер Нариман Абдулмуталибова, Россиядин МЧС-дин РД-да авай Управленидин кьил Муслим Девришбегова, РД-дин тамун майишатдин комитетдин регьбер Вагьаб Абдулхамидова иштиракна.
Совещанидал малум хьайивал, Унцукул районда цIай хкадарунал 97 касни техникадин 17 уьлчме, Тлярата районда — 78 касни техникадин 12 уьлчме, ЦIумада районда — 38 касни техникадин 9-уьлчме, Бежта участокда 46 касни техникадин 8 уьлчме желбнава. А.Абдулмуслимова четин участокра цIай хкадардай къуллугъчийрин ва техникадин уьлчмейрин кьадар гзафарун тапшурмишна.
Къейд ийин хьи, РД-дин Гьукуматдин къарардалди Дагъустанда 31-октябрдалди тамун мулкара цIай кьунин хаталувал авайди тестикьарнава. И документди гьам тамухъанривай, гьамни тамун мулкариз ял ягъиз физвайбурувай тайин шартIарал амал авун истемишзава.
Чи мухбир
