Россиядин Яшайишдин фондунин (СФР) Дагъустанда авай отделенидин пресс-къуллугъди хабар гузвайвал, агьалидин 80 йис тамам хьуникди ва гьакIни 1-группадин инвалиддихъ гелкъуьнай пул къачузвай пенсионеррин кьадар, алатай йисав гекъигайла, саки 3,5 агъзурдан артух хьанва. Амма гзафбуру чпиз и пул хгузмач лугьуз, арза авун давам жезва. Кар ана ава хьи, цIийи къайдада тайинарзавайвиляй гзафбуруз и пул хгузмачир хьиз ава…
РикIел хкин: 2025-йисан 1-январдилай 80 йис тамам хьанвай агьалидихъ ва 1-группадин инвалиддихъ гелкъуьнай гузвай пул гила арза галачиз (проактивно) тайинарзава. Ам пенсиядал алава хъийизва, гьар йисуз пенсиядихъ галаз сад хьиз адан кьадарни артух жезва. 80 йис хьанвай агьалидихъ ва 1-группадин инвалиддихъ гелкъуьнай гузвай пулунин кьадар къенин юкъуз артух хьанва. Дагъустандин Яшайишдин фондунин малуматрин бинедаллаз, идакай чна газетда са шумудра, гьакI алай йисан сифтегьан нумрадани хабар ганва. Малум тирвал, виликдай ам гелкъвезвай кас къалурнавай делилрин бинедаллаз, зегьмет чIугваз жедай бажарагъ авай ва кIвалахдик квачир касди (пенсионердихъ гелкъвезвай багъри ва я мукьва кас) и арза, гьакIни пенсионерди а кас вичихъ гелкъуьнал разивал гуналди тайинарзавай. Идарадин малуматда мадни гъавурда твазвайвал, гила винидихъ гъанвай къайдада ам тайинар хъийизвач, яни и пул тайинарун лазим тир касди арза кхьин, гелкъвезвай кас къалурун ва маса делилар агакьарун герек къвезвач. Амма куьгьне къайдада и пул тайинарнавай ксар патал къалурнавай вахт куьтягь жедалди ам гузва. 1200 манат пул, винидихъ къалурнавай агьалийри къачузвай пенсиядилай аслу тушиз, яни страховой ва я яшайишдин пенсия къачуниз килиг тавуна, адал алава хъийизва. Эгер агьалиди кьве пенсияни къачузватIа, СФР-дин региондин отделениди 1200 манат абурукай садал алава хъийизва. Винидихъ къейднавайвал, алава пулни, пенсия хьиз, гьа са вахтунда ва, процентрал гьалтайла, гьа са кьадарда аваз артухарзава.
Мадни къейд ийиз кIанзава хьи, алай йисан январдин, февралдин ва апрелдин варцара пенсиядин кьадар артухарайла, и пулунин кьадарни хкаж хьанва, виликдай хьиз, виридаз са кьадарда аваз гузвач, яни 1200 манат яз амач. ЦIийи къайдада, яни арза галачиз, и пул инвалид аялдихъ гелкъвезвай касдизни гузва. Алай йисан 1-январдилай и пулни аялдин пенсиядал алава хъийизва. Арза галачиз тайинарзавайвиляй гзафбуру чпиз гелкъуьнай пул хгузмач лугьуз арза ийизва. Амма кардал гьалтайла, яни цIийи къайдада тайинаруналди, ахьтин пенсионеррин кьадар чи республикада хейлин артух хьанвайди ашкара жезва. ИкI, Дагъустандин Яшайишдин фондунин малуматдал асаслу яз, эгер 2024-йисан эхирра и пул республикада 56 агъзурни 800 касдиз гузвайтIа, алай йисан июлдиз ахьтинбурун кьадар 60 агъзурдалай алатнава.
Къейд. Яшайишдин месэлайрай (пенсия, аялдин пособие дуьз тайинарнавани, авачни ва амай вири суалриз талукь жавабар) квевай СФР-дин сайтдай, районра кардик квай пенсийрин отделенийрай (абуру ислендилай хемисдалди — пакаман сятдин 9-далай нянин сятдин 6-далди ва жуьмядиз пакаман сятдин 9-далай нянин сятдин 5 тамам жез 15 декьикьа амаз вахтуналди кIвалахзава), гьакIни гьафтедин кIвалахдин винидихъ къалурнавай йикъара ва сятера, Россиядин Яшайишдин фондунин алакъадин сад тир къурулушдикай менфят къачуналди, федеральный центрадин 8-800-100-00-01 нумрадиз зенгна, чириз, лазим меслят къачуз жеда. Зенг пулсузди я.
Рагнеда Рамалданова
