Чна виликдайни хабар гайивал, алай йисан эвелрилай инихъ дяведин махсус серенжемдин иштиракчийривай Яшайишдин фондунин реабилитациядин центрайра, санаторийра ва курортра чпин сагъламвал гуьнгуьна хутаз жезва. ИкI, Россиядин Яшайишдин фондунин (СФР) Дагъустанда авай отделенидин малуматда къейднавайвал, къенин юкъуз уьлкведа реабилитациядин 12 центр кардик ква. Абур вири алай аямдин тадаракралди, сагъламвал мягькемарун патал лазим вири шартIаралди таъмин я. Санаторийрани курортра сагъламвал йиса са сеферда 21 юкъуз мягькемариз жеда. Реабилитациядин центрайра и серенжем шумуд сеферда ва гьи кьадар вахтунда кьилиз акъуддатIа, СВО-дин ветерандин сагъламвилин гьалдилай (медицинадин делилрилай) аслу я.
Реабилитациядин центрайриз рекье тун патал СВО-дин ветерандин сагъламвилин гьакъиндай МСЭ-дин (медико-социальная экспертиза) делилар фикирда кьада. Эгер виликдай сагъламвал ахтармишнавачтIа ва инвалидвал тайинарнавачтIа, реабилитациядин центрада и серенжем кьилиз акъудда, лазим жуьредин вири куьмек гуда. СВО-да Россиядин Игитвилин тIварцIиз лайихлу хьайибуруз ва я 1-группадин инвалидриз направление учир авачиз гуда.
Арзаяр Яшайишдин фондунин муьштерийрихъ галаз кIвалахзавай къуллугъра ва «Госкъуллугъар» порталдин куьмекдалдини гуз жезва. Гьар са арзадин гьакъиндай пешекарри кIвалахдин 2 йикъан къене къарар кьабулда. Россиядин Яшайишдин фондунин реабилитацийрин центрайра чпин сагъламвал гуьнгуьна хтунвай дагъустанвияр тир СВО-дин ветеранри центраяр вини дережадин тадаракралди таъмин тирди раижзава, духтурри еке дикъет гунин, кьилиз акъудзавай серенжемрин менфятлувилин тарифзава.
Россиядин реабилитациядин вири центрайрикай тамам малуматар https://sfr.gov.ru/about/rehabilitation_centers/ сайтда ганва.
Эгер и ва маса месэладиз талукь яз суалар аматIа, абур квевай, Россиядин Яшайишдин фондунин cад тир алакъадин центрадиз зенгна (телефон: 8-800-200-03-39), жавабар жагъуриз жеда. Зенг пулсузди я. Дагъустанда авай отделенидин алакъадин центради ислендилай хемисдалди пакаман сятдин 9-далай нянин сятдин 6-далди зенгер кьабулзава, жуьмядиз — пакаман сятдин 9-далай нянин сятдин 5 тамам жез 15 декьикьа амай вахтуналди.
Регина Семедова
