Дагъустандин Кьилин везифаяр вахтуналди тамамарзавай Федор Щукина Республикадин перинатальный центрадал кьил чIугуна. Ам комплексдиз килигна, духтуррихъ ва таза аялар ханвай дидейрихъ галаз гуьруьшмиш хьана.
Центр 2017-йисалай кардик ква. Адан пешекарар вахт жедалди хайи аялрихъ гелкъвезва, абуруз алай аямдин ерилу технологийрин медицинадин рекьяй къуллугъзава.
Ана аялар хадай, таза аялрин патологиядин, реанимациядин ва физиологиядин отделенияр ава. Центрадин пешекарвал хкаждай базада Дагъустандин вири шегьеррин ва районрин медицинадин идарайрин акушеррин, гинекологрин ва неонатологрин чирвилер хкаждай классди кIвалахзава.
Аялар хуьнин международный югъ тир 1-июндиз Дагъустандин Кьилин везифаяр вахтуналди тамамарзавай Федор Щукина вахт жедалди аялар ханвай дидейриз савкьатар багъишна ва ада дидейризни аялриз сувар тебрикна.
«Азиз дидеяр! За квез и гуьзел сувар рикIин сидкьидай мубаракзава. И дараматда квев медицинадин ерилу куьмек агакьна ва дуьньядал сагълам аялар атана. Им рикIиз пара хуш кар я. Аялар чIехи жеда, абуру квез шадвал гъида. Куь сагъвал артух ва куьн мадни бахтлу хьурай! Аялар хазвай дидейриз гьукуматди талукь вири жуьредин къулайвилер, шартIар тешкилун патал вичелай аслу вири крар ийида», – лагьана Федор Щукина.
«Лезги газет»
