Россиядин халкьарин садвилин йис
5-февралдиз Ахцегь районда Россиядин халкьарин садвилин йис РДК-дин залда «Россия – са хизан!» лишандик квай мярекатдалди ачухна. Мярекат райсобранидин председатель Гьажимурад Парпачева ачухна.
– Гьуьрметлу юлдашар, Президент В.В. Путинан къарардалди 2026 — йис уьлкведа чи халкьарин садвилинди яз малумарнава. Россиядин къуват халкьарин садвиле ава. Чи уьлкве къе 200-ев агакьна халкьарин умуми ватан я. И кар чи тарихдин вакъиайра халкьарин ивидалди тестикь хьанва. Дуьньядин сад лагьай дяведин вахтунда Кавказдин халкьарикай, абурун викIегьвал акуна, атлуйрин дивизия тешкилна. 7 агъзурдалай гзаф дагъви аскерри къуллугъна, гьар кьвед лагьайди Георгиян хашуниз, «Жуьрэтлувиляй» медалриз лайихлу хьана. Ватандин ЧIехи дяведа СССР-дин вири халкьарин къуватралди фашизм дарбадагъна. Сталинградда машгьур Павлован кIвал хвейи игитрин десте 12 халкьдин векилрикай ибарат тир. Гила СВО-да цIийи миллетчийрихъни фашистрихъ галаз чи уьлкведин вири халкьарин векилри женг чIугвазва, – къейдна Гьажимурад Гьемзетовича.
Иллаки алай четин макъамда, НАТО-дин уьлквеяр Россиядал элкъвенвайла, уьлкведин азадвал, аслу туширвал таъминарун патал халкьарин дуствилинни садвилин алакъаяр мягькемарун важиблу я. Ихьтин фикир ачухарзавай рахунар мярекатдал гзафбуру авуна.
Дашдемир Шерифалиев
