Сад тир къурулуш жеда
2026-йисан 1-сентябрдилай Россиядин мулкунал уьлкведин банкари акъуднавай гьахъ-гьисабар ийидай вири картаяр кваз кьунин сад тир къурулуш кардик акатда.
Хабар гузвайвал, къурулушдик пулунин гьахъ-гьисабар ийидай вири жуьрейрин, гьа гьисабдай яз Visa, Mastercard ва «Мир» картаяр кутада. Гьисабдиз гьам къуватда авай, гьамни чеб ишлемишдай «вахт алатнавай» картаяр къачуда, гьелбетда, эгер банкуни абуруз къуллугъ авун давамарзаватIа.
Гуьзлемишзавайвал, ихьтин сиягь арадал гъуни луту-птувилихъ ва банкарин картаяр «дропперрин», яни арачивилин везифаяр тамамарзавайбурун схемайрихъ галаз женг чIугунин карда куьмек гуда. Банкарин къурулушда «дроппер» тахсиркарвилин рекьелди къазанмишнавай пул вичин картадай ракъурзавай касдиз лугьузва. Адан везифа луту-птувилин къурбанд хьанвай касдивай пулдин такьатар къачун, ахпа абур масаниз рекье тун ава: нагъд пул яз алудун, маса счетдиз ракъурун, криптовалютадихъ дегишарун ва икI мад. МасакIа лагьайтIа, дроппер – им банкарай ракъурзавай пуларин гел квадариз куьмек гузвай кас я. Ихьтиндаз гьатта вичи ийизвай кIвалах законсузди тирди чир тахьунни мумкин я: эгер ам арада мензил аваз кIвалахзавай кас яз хьайитIа.
Идахъ галаз сад хьиз, 2027-йисан 1-сентябрдилай банкарин картайрин кьадар сергьятламишунин дегишвални къуватда гьатда. ИкI, эгер касдив 20 карта гваз хьайитIа, мад са цIийиди адавай са банкунани ахъайиз жедач. Гьа са вахтунда, хабар гузвайвал, вичин тIварцIихъ акъуднавай амай вири картайри кIвалах давамарда – цIийи къайдаяр анжах цIийи картайриз талукь жеда.
Къейдзавайвал, банкарин картайрин иесийрин вилик са йис ква – и девирда абурувай гьибур ишлемишдатIа, гьибур агалдатIа хкягъиз жеда. Банкари чпи лагьайтIа, ахъайнавай и картаяр агалдач.
РикIел хкин, РФ-дин Милли банкунин Дагъустан Республикада авай управленидин 2026-йисан 1-апрелдин делилралди, региондин мулкунал банкарин 4,6 миллион карта акъуднава – идалай вилик йисан гьа и девирдив гекъигайла, 6 процентдин гзаф. 2026-йисан январдиз-мартдиз дагъустанвийри Тадиз гьахъ-гьисабар авунин системадин куьмекдалди 180 миллиард манатдин 47,5 миллион серенжем (транзакция) авунва – идалай вилик квай йисан гьа и девирдив гекъигайла, серенжемрин кьадардай – 10,6 процентдин, рекье тунвай пулдин такьатрин кьадардал гьалтайла 8,4 процентдин гзаф.
Шикил: https://dagpravda.ru/
Чи мухбир