Дагъустанда чилерин ва государстводин эменнидин сад тир рекъемрин карта арадал гъида.
РД-дин Гьукуматдин Председателдин заместитель Заур Эминова гъавурда турвал, и проект 2027-йисан 1-январдалди уьмуьрдиз кечирмишдайвал я.
«И кIвалахар акьалтIарайла, чна республикадин мулкунал алай вири чилерин рекъемрин фундамент арадал гъун лазим я. Ам гьам госэменнидин, гьамни чилерин хиле идара авун патал дуьзгуьндаказ туькIуьрнавай къурулуш хьун лазим я. Нетижада итиж ийизвай касдивай чилин, адан кадастрдин къиметдин гьакъиндай гьакъикъи вири делилар са чкадай къачуз, я тахьайтIа, герек делилар къачун патал аниз арзаяр рекье тваз жеда», — къейдзава З.Эминова.
Ихьтин карта туькIуьрун патал республикадин мулкар (чилерин, тамарин, цин объектрин сергьятар ва маса делилар) гьавадай ахтармишзава.
РД-дин Кьил Сергей Меликован тапшуругъдалди 2022-йисалай инихъ Дагъустан Республикада «Пространственный делилрин милли къурулуш» проект уьмуьрдиз кечирмишзава.
Пространственный делилрин милли къурулуш арадал гъунин бинеда чилин, юзан тийидай эменнидин (кIвалерин, дараматрин, маса объектрин), кадастрдин къиметдин, гьа жергедай яз и эменнидин иесийрин гьакъиндай делилар рекъемрин сад тир майдандал кIватIун ава.
Дагъустан и программа кьилиз акъудзавай ахтармишунин регионрикай сад я. СКФО-дин субъектрикай Дагъустан хкягъунин себеб ам я хьи, адахъ пространственный делилар кIватIунин ва гьялунин кIвалах автоматламишунин жигьетдай виридалайни хъсан мумкинвилер ава.
