Гегьенш майданра кьиле тухузвай ремонтдин кIвалахар алай йисан эхирдалди кьилиз акъудда. Пландин бинедаллаз эквер хкудунар ЦIийи йисан вилик квай ва суварин йикъара жедач. Идакай «Дагъустан» РИА-дин майдандал кьиле тухвай пресс-конференциядал «Россети-Северный Кавказ» — «Дагэнерго» карханадин кьилин инженер Гьажи Гьажиева лагьана. Республикадин электросетрин комплексда арадал атанвай гьалариз талукьарнавай гуьруьшда гьакIни РД-дин энергетикадин ва тарифрин министерстводин векил Марат Шихалиева, Махачкъаладин администрациядин ЖКХ-дин управленидин начальникдин заместитель Сайидгьуьсейн Мегьамедова, шегьердин кьилин меслятчи Гьажи Султанова иштиракна.
Малум хьайивал, Дагъустанда ремонтдин кIвалахар кьиле тухудайла, асул фикир меркездиз гузва. И кардал энергетикрин 35-дав агакьна бригадаяр желбнава. Абурун хатасузвал таъминарун патал кIвалахар кьиле тухузвай вахтунда графикдин бинедаллаз электричество хкудзава.
«Дагэнергодин» филиалдин делилралди, Махачкъалада пешекарри трансформаторрин 13 подстанциядин гужлувал гзафарнава, гзаф гуж акьалтзавай бязи трансформаторар, даяхар, симер дегишарзава, герек маса кIвалахарни ийизва. Ида шегьердин виридалайни муракаб гьалар авай районра электроэнергиядалди таъминарунин кIвалах гуьнгуьна твадай мумкинвал гуда. Идалай вилик ихьтин чкайра, энерготадаракрал гуж акьалтун себеб яз, мукьвал-мукьвал ва гегьенш майданра эквер хкатзавай.
Гуьруьшда иштиракай пешекарри хабар гайивал, республикадин ва меркездин энергокъурулушдин 75 процент куьгьне хьанва, ам лап усал гьалда ава. Санлай къачурла, уьлкведин маса регионрив гекъигайла, республикада арадал атанвай гьалар виридалайни муракаббур я. Амма месэла гьялдай рекьер жагъурнава ва мукьвал вахтунда гьалар хъсан патахъ дегиш жеда.
Республикадин электросетрин къурулуш алукьзавай хъуьтIуьз гьазурун патал Россетри 545 миллион манат чара авунва, амма им лап тIимил я. Республикадин энергосубъектрал мукьвал-мукьвал аварияр жезвайтIани, хъуьтIуьз гьазур хьунин паспорт къачуз хьана. Амма анжах республикадин Кьил Сергей Меликова, Федерациядин Советда рахадайла, уьлкведин Президентдиз арза авунин нетижада 1 миллиардни 200 агъзур манат чара авурдалай кьулухъ. Меркезда гьалар гуьнгуьна тун патал 870 миллион манат чара авунва. Санлай къачурла, пешекарри республикадин агьалийривай сабур хуьн тIалабзава – мукьвал вахтунда къурулушда гьалар хъсан патахъ дегиш хьун лазим я.
Амина Муслимова
