17-январдиз РД-дин Гьукуматдин Председатель Абдулмуслим Абдулмуслимова Казбек районда агьалияр целди таъминардай цIийи объектар ачухунин мярекатра иштиракна.
И юкъуз муниципалитетда «Михьи яд» ва «Яшайишдин кIвалер ва шегьердин шартIар» федеральный проектрин сергьятра аваз эцигнавай кьве объект — Дылым хуьр целди таъминардай къурулушар туькIуьрунин кьвед лагьай пай ва Акташ вацIай къачузвай яд райондин 6 хуьруьз агакьардай водовод — ишлемишиз вахкана. Абур ачухуниз талукь яз районда са шумуд мярекат кьиле фена.
ИкI, сифтедай премьер-министрди Казбек райондин кьил Гьажимурад Мусаевахъ ва са жерге маса гьакимрихъ галаз яд къачузвай чка ва цин турбадин рехъ Эшеха лугьудай чкада ахтармишна. А. Абдулмуслимова вичи и месэла 2 йис вилик гъиле кьурдакай ва алатнавай вахтунда гзаф крар кьилиз акъуднавайдакай лагьана.
«Михьи целди таъминарун ва къулай шартIар тешкилун чна кIвалахда кьетIен фикир гузвай рекьер я. Им муракаб проект тир. Гила Казбек райондин 30 агъзурдалай гзаф агьалияр целди таъмин я. 6 хуьруьн агьалияр патал им халисан суварин югъ я лагьайтIа жеда», — малумарна ада.
Идалай гуьгъуьниз премьер-министр Алмак хуьре цин гьамбарханаяр ачухзавай чкадиз фена. Живеди кьунвай дагъларин юкьва авай ина «Газинжсети-Техно» ООО-дин пешекарри хуьр михьи целди таъминардай кран шад гьалара ачухна. Идарадин регьбер Ибрагьим Ибрагьимова къейд авурвал, проект гьам инженериядин, гьамни яшайишдин жигьетдай муракабди, гзаф кIвалах истемишайди я.
«Заз чизва, райондин агьалияр и цихъ тамарзу тир. Чна яд къунши райондай 1470 метрдин кьакьандай къачузва. Чешмедилай муьштеридал кьван 1000 метрдилай виниз мензил ава, талукь яз, турбадал 100 атмосфердилай гзаф гуж акьалтзава — гьич са турбадивайни ихьтин гуж эхиз жедач. Гьаниз килигна, чун гидротехникадин муракаб тадаракар туькIуьруниз мажбур хьана. Нетижада гьар са агьалидал суткада 1230 литр яд гьалтдай таъминвал жеда», — лагьана ада.
Идалай кьулухъ делегация Дылым хуьруьз рекье гьатна. Ина мугьманри водовод шад гьалара ачухна. Райондин жемятдин вилик рахадайла, Абдулмуслим Абдулмуслимова РД-дин Кьил Сергей Меликоваз, Дагъустандин талукь министерствойриз, райондин администрациядиз — проект уьмуьрдиз кечирмишунин карда иштиракай вирибуруз чухсагъул лагьана.
Дылым хуьр целди таъминарунин кьвед лагьай паюнин проектдиз 190 миллион манатдилай гзаф пул рекье тунай, генеральный пудратчи — «Мостоотряд-99» ООО. Яд агакьарзавай турбадин яргъивал 34,1 километрдиз барабар я. И рекье элкъвей 206 къуй, 600 кубометр цин гьамбархана, гьакIни яд михьдай 1 станция туькIуьрнава.
Кьвед лагьай объектдин генеральный пудратчи, винидихъ къейд авурвал, «Газинжсети-Техно» ООО тир. Проектдин бинеда дагълух чкадин гзаф четин рельефдай 48 километрдин мензилдиз цин турба тухун, михьи цин 12 гьамбархана ва Акташ вацIал яд къачудай 6 тадарак эцигун авай.
Шад мярекатдал А. Абдулмуслимова райондин са жерге пешекарриз, госкъуллугъчийриз ва пудратдин карханайрин векилриз шабагьар, гьуьрметдин грамотаяр ва чухсагъулдин чарар гана.
Амина Муслимова
