И дуьньяда анжах йикъар акъудзавай ваъ, чпин къени краралди, зегьметдалди чун элкъуьрна кьунвай ерияр авадан ийизвай ксар ава. Мирзеханова Назият Мирзебалаевна гьа ихьтин инсанрикай тир. Адан уьмуьрдин рехъ багърияр, мукьвабур патал къурбанд авунин, везифайриз вафалу хьунин, сергьят авачир кьван къайгъударвилин тарих я.
Вичин ери-бине СтIал Сулейманан райондин Хъартасрин хуьряй тир Назият Мирзебалаевнади уьмуьр Бутрин хуьруьз багъишна: анин агьалидиз гъуьлуьз фена, гьана хизан кутуна. Адан уьмуьрдин рехъ имтигьанрив ацӀанвай. Гзаф йисар хьана хизанда аялар авачиз. Са кьадар вахтар алатайла, Аллагь-Таалади адаз руш багъишна. Лап жегьилзамаз адан къари рагьметдиз фена, хизандин вири везифаяр жегьил дишегьлидин хиве гьатна. Идалайни гъейри, ам Ватандин ЧӀехи дяведин ветеран тир апаяхъ 19 йисуз гелкъвена. Назият Мирзебалаевна датIана вичин мукьва-кьилийрин, уьмуьрдин юлдашдин багърийрин веледрин къайгъуда жедай.
Ада вичин уьмуьрдин яхцӀур йисан гьакъисагъ зегьмет рикI алай пешедиз, школадиз гана. Аялриз тарсар гун ам патал гьакӀан са кӀвалах тушир, умуьрдин къакъудиз тежер пай тир.
Халисан диде яз, ада вичин вири къуватар руш тербияламишуниз серфна, адаз лайихлу образование гана ва уьмуьрдин рехъ жагъуриз куьмекна. Назият Мирзебалаевнадин кӀанивал акьван чӀехиди тир хьи, ам гьамиша вичин багърийрин четинвилер кьезилариз алахъдай. Рушаз кьве аял хуьн четин хьайила, бадеди важиблу къарар кьабулна — хтулрикай сад вичин патав тухвана.
Уьмуьр гьамиша регьятди тушир. 2019-йисуз адан уьмуьрдин юлдаш рагьметдиз фена, Назият Мирзебалаевна 7-классда авай хтул рушахъ галаз текдиз амукьна. Хажалатди, бедбахтвили ам неинки руьгьдай вегьенач, къуватсуз авунач, гьакӀни адаз адетдин бадедилай гъейри, вичин хтул патал насигьатчи, илгьамэгьли, вири терефрихъай хуьдайди жедай къуватар гана.
Адан куьмек, иман ва дуьаяр себеб яз, хтулдин Дагъустандин госуниверситетдин (ДГУ) филологиядин факультетдик экечӀунин мурад кьилиз акъатна. Назият Мирзебалаевнадиз чирвилерин, кIелунин къимет чизвай, вичин хтулдизни илимди инсандин уьмуьрда кьазвай чка садрани квадар тавуникай лугьузвай.
Студентка хьанвай хтул кӀелиз фейилани, бадеди бушвалнач. Чи ата-бубайрин девирра хьиз, ам вичин дувулрихъ, кӀвалерихъ галаз дериндай алакъалу, хайи ерийриз вафалу кас тир. Вич патал къеле тир чкадин къулайвал, чимивал хуьз, ада хтулдин, рушан патав куьч хьун кьабулзавачир. Хуьруьн майишатдал машгъул жезвай, шегьерда кӀелзавай хтулдиз куьмек гузвай, адаз герек вири затIар рекье твазвай. Кьериз-цIаруз ятIани, Назият Мирзебалаевна хтулдин патав Махачкъаладиз фидай ва хтулни сувариз, кӀелунин вахт куьтягь хьайила, гатуз рухсатдин вахтунда адан патав хуьруьз хкведай. И рекьер анжах бадедивай гуз жедай кьетӀен чимивилив ацӀанвай. Гьа са вахтунда хтулдиз Назият Мирзебалаевна анжах баде тушир, ам адан вири дуьньядиз элкъвена. Чара ийиз тежедай бине, секин макан ва уьмуьрдин рехъ къалурзавай экв, чешне хьайи кас я.
Гьайиф хьи, кьисмет ахьтинди хьана хьи, азарди гъалибвал къачуна. Ам чидай вирибуру эхиримжи нефесдив агакьдалди сагъ хъхьуник, адан уьмуьрдин зурба къуватдик умуд кутунвай. Амма 2025-йисан 17-апрелдиз Назият Мирзебалаевна рагьметдиз фена. Веледриз еке дестек хьайи, лап муракаб уламрай экъечIай дишегьлиди, гьатта азарлу тиртIани, эхирдалди ажузвал хиве кьунач, гьамиша уьтквемдиз кӀвачел акъвазна.
Назият Мирзебалаевна неинки мектебда гьакъисагъдаказ кIвалахай пешекар яз, гьакI вичин къенивилелди инсанрин рикIера дерин гел тур инсан яз чида. Ада вичин рушан рикӀе, хтулдин агалкьунра, уьмуьрда вичи кьилиз акъудай, кьил кутур гьар са хъсан карда яшамиш хьун давамарзава.
Ви нур чахъ гьамишалугъ галаз хьурай, чи играми, кӀани инсан.
Камила Абдуселимова,
ДГУ-дин филологиядин факультетдин урус
ва Дагъустандин чIаларин отделенидин 3-курсунин студентка
