И йикъара Москвадин областдин Люберцы шегьерда залан атлетикадай Россиядин Кубок патал кьиле фейи акъажунра (абур 6-февралдиз акьалтIна) чи ватанэгьли Исмаил Гьажибегова 55 кг-дал къведалди заланвал авайбурун арада инанмишвилелди гъалибвал къазанмишна.
Гила ам уьлкведин Кубокдиз галаз-галаз 6-сеферда лайихлу хьанва. Дагъустанвийрикай ихьтин еке агалкьун къазанмишиз алакьнавай ам сад лагьай спортсмен я. Дагъустандин хкянавай командадик кваз иштиракай Ислам Абакаров 2-чкадиз лайихлу хьана.
Къейд авун лазим я хьи, и акъажунра чи уьлкведин жуьреба-жуьре регионрай тир 400-дав агакьна спортсменри чпин алакьунар ва устадвал къалурна. И. Гьажибегова, санлай къачурла, 225 кг (рывокда — 105 ва толчокда — 120 кг) хкажна. И. Абакарова, санлай къачурла, 216 кг хкажна, адани 55 кг-дин заланвал авайбурун арада вичин устадвал къалурна. Спортсменри тренерар Гьуьсенхан Закарьяеван ва Мансур Эльмурзаеван гъилик чпин устадвал хкажзава.
РикIел хкин: И. Гьажибегов 1995-йисан 29-июлдиз Докъузпара райондин Мискискарин хуьре дидедиз хьана. Россиядин 6 кубокдин хьиз, ам уьлкведин кьуд сеферда чемпионвилин ва кьве сеферда призёрвилин тIварарин сагьиб, Россиядин спортдин мастер я. Алатай йисуз Россиядин Кубок 5-сеферда къазанмишуналди, санлай къачурла, 238 кг хкажуналди чи ватанэгьлиди уьлкведин рекордни эцигнай.
Рагнеда Рамалданова
