Алай йисан апрелдин эхирра Башкириядин меркез тир Уфада 15-17 йисан яшда авай жаванрин арада дзюдодай Россиядин чемпионат кьиле фена. Мярекатда гьукуматдин 31 субъектдай 190 спортсменди иштиракна. Абурун арада чи ватанэгьлийри, гьа жергейдай яз Кьасумхуьрелай тир Камил Гьасанова чпин устадвал къалурна. И акъажунра Камила 73 кг-дин заланвал авайбурун арада Россиядин чемпионвилин тIвар къазанмишна.
Камил Гьасанов 2008- йисуз дидедиз хьана. ГъвечIизмаз спортдал рикI алай ам, школадиз фейи йисарилай башламишна, дзюдодал рикIивай машгъул хьана. Спортдин сирер ада вичиз райондин аялринни жаванрин дзюдодинни самбодин спортшколада Россиядин лайихлу тренер Телман Къурбанован гъилик чирзава. РикIел хкин: Камила 2023-2024-йисара Дагъустан Республикадин образованидинни илимдин министерстводи кIвенкIвечивал патал кьиле тухвай бягьсера призрин чкаяр кьуна. Мадни, 2024-йисуз Челябинскда дзюдодай 15-17 йисарин яшда авай жаванрин арада кьиле фейи Россиядин чемпионатда чи кьегьал хва буьруьнждин медалдин сагьиб хьанай.
К. Гьасанован алакьунрикай, спортдин рекье адан къастарикай рахайла, чаз спортсмендин тренер Т. Къурбанова ихьтин баянар гана: «Камил зи гъилик атай сифте йикъалай вичиз спортдин сирер дериндай чириз, и кар патал вичин къуватар серф ийиз чалишмиш жезва. Адахъ агалкьунар жедайдахъ зун кIевелай инанмиш тир. Къенин юкъуз чун Камилан нетижайри шадарзава. Ада спортдин мадни чIехи кукIушар муьтIуьгъардайдахъ зун умудлу я».
Россиядин чемпионвилин тIвар къазанмишнавай чи ватанэгьлидал чна рикIивай дамахзава. Къуй Аллагьди адаз Олимпиададин кьакьан кукIушар муьтIуьгъардай къуватар ва мумкинвал гурай!
Зарият Агъарагьимова
