Романаз баркалла!
Вичин ери-бине Ахцегь райондин Луткунрин хуьряй тир ва алай вахтунда хизанни галаз Къазахстандин Актау шегьерда яшамиш жезвай Роман Максумовакай боксдай Къазахстандин чемпион хьанва лагьай муштулухди чун кьадарсуз шадарна.
Жуван ватандаш ихьтин чIехи дережадиз акъатун, луткунвийрикай сифте яз боксдай къизилдин медаль къачун гьакъикъатдани тебрикуниз лайихлу я. Алай вахтунда ам Красноярск шегьерда дуьньядин чемпионатдиз гьазур жезва. Гележегда олимпиадада иштиракдай фикир ава.
Чна Романаз, жегьилдин сифте муаллим-тренервал авур спортсмен адан бубадиз, чIехи буба Шамилаз, Максумоврин чIехи вири сихилдиз, гьакI вири луткунвийриз и агалкьун рикIин сидкьидай мубаракзава.
ГьикI акъатна Максумовар Луткунай яргъал Къазахстандин Актау шегьердиз? Зегьметкеш чIехи хизандай тир Кериман хва Шамил, хайи хуьре лайихлудаказ хизан хуьдай кIвалах-мумкинвал авачиз, 1972-йисуз Къазахстандиз фена. Ана урус руш Эльбинадал эвленмиш хьана, кIвал-югъ кутуна. Абуруз пагьливанар хьтин кьве хва ава: Романни Желли. Сифте фялевилин гьар жуьре кIвалахар ийиз, ахпа хсуси фирма ачухна кIвалахиз, Шамил, инсанвилинни зегьметкешвилин къилихар себеб яз, чкадинбурун арада жуванди хьана. ИкI, коллективдин ва жемятдин арада лайихлу гьуьрмет къазанмишай Шамил алай вахтунда вичин тIвар алай фирмада, гьуьлуьн уькIуь яд (ана хъвадай михьи цикай кьитвал ава кьван) хъваз жедай михьидаз элкъуьрунин важиблу месэладал машгъул я. Мергьяматлувилинни ватанпересвилин ерийралди тербияламиш тир ада хуьруьнвийриз алакьдай куьмекарзава: ярар-дустарни хуьруьнвияр гьана кIвалахрик кутазва, кIеве гьатайбурун гъил кьазва ва икI мад.
Дашдемир Шерифалиев