Дагъустанда ришветбазвилиз акси женг давам жезва: алай йисан сад лагьай паюна республикада ришветбазвилин 467 дуьшуьш винел акъуднава. Ихьтин рекъемар и йикъара РД-дин Кьил Сергей Меликован регьбервилик кваз Махачкъалада кьиле фейи заседанидал региондин МВД-дин кьилин везифаяр вахтуналди тамамарзавай Леонид Можеровцева раижна.
Къейд ийин хьи, абурукай 327 кIеви ва акьалтIай кIеви тахсиркарвилер яз гьисабзава. Ришветбазвилин тах квай тахсиркарвилериз талукь яз къарагъарай уголовный делойрин нетижада бюджетдиз 154,1 миллион манатдин зиян ганвайди субутна. И такьатрин чIехи пай элкъвена бюджетдиз хкиз алакьнава.
Къанун-къайда хуьдай органрин векилри кьиле тухвай кIвалахдин нетижада малум хьайивал, коррупция виридалайни пара бюджетдин такьатрин хилез хас я. Кьилди къачуртIа, гьукуматдин пулдин гьисабдай тайин са кIвалах ийидайла, документра кьадардин гьакъиндай гьакъикъатдихъ галаз кьан тийизвай рекъемар (авайдалай са шумуд сеферда артухарна) къалурзава. Госзакупкаяр кьиле тухудайла, шейэр са къиметдай къачузва, документра лагьайтIа, маса къимет къейдзава.
Л. Можеровцеван гафаралди, алай вахтунда фермерриз куьмек гун патал бюджетдик кутур такьатрикай 25 миллион манат мемекьуьртI авунай силисдин кIвалах давам жезва. Къейд ийин хьи, и дуьшуьшдин гьакъиндай къарагъарнавай уголовный делода тахсиркарар республикадин хуьруьн майишатдин недай суьрсетдин министерстводин виликан къуллугъчиярни са муниципалитетдин карханадин векилар я.
Сергей Меликова нетижалу кIвалах кьиле тухунай региондин МВД-дин тIварцIихъ разивилин гафар лагьана ва къанун-къайда хуьдай органар инлай кьулухъни коррупциядихъ галаз алакъалу тахсиркарвилер винел акъудунал машгъул жедайди къейдна.
Агьмед Магьмудов
