Литературадин мярекатар
Чна, 70-йисарин жегьилри, чи рикI алай шаир Ибрагьим Гьуьсейнован лирика руьгьдик кужумнавай. Амай зи таяр-туьшерикай завай лугьуз жедач, амма за адан эсерриз ва, абурулай башламиш хьана, вири поэзиядиз гилани, жув пенсиядин яшдиз акъатайла, итиж ийизма. Зун библиотекайризни рехъ рикIелай алатнавайбурукай туш, кIвалени захъ вижевай библиотека ава.
И мукьвара зун республикадин Р. Гьамзатован тIварунихъ галай библиотекадиз фенвай. Фойеда зи вилер гьасятда фикир желбдайвал туькIуьрнавай «Шаирдин рикIин гаф» стендда акьуна. Ам Ибрагьим Гьуьсейнован девлетлу ва жуьреба-жуьре терефрин яратмишунриз бахшнавайди тир. Жегьил шаирдин эвелимжи ктабдилай эгечIна, гила акъатзавай гзаф томрин сифтегьан кьуд чIехи томдал къведалди, стенддал алай ктабри шаирдин яратмишунрин рекьикай, ада чаз тунвай девлетлу ирсиникай лугьузвай.
Ингье адан, 23 йисан яшда авайла, акъатай шииррин эвелимжи кIватIал «Рекьер-хуьлер» (лагьана кIанда хьи, печатдиз адан шиирар 15 йис хьайидалай кьулухъ акъатзавай). Аялар патал кхьенвай «Бахтар пайзава» ктаб. «Шарвили» поэма, хайи хуьруьн тIвар алай «Алкьвадар» кIватIал…
Вахтар финикди шаир устад хьиз чIехи ва тежрибалу жезвай. Сад муькуьдан гуьгъуьналлаз акъатзавай ктабрин тIварарайни кваз адан яратмишунрин сергьятар гьикI гегьенш жезвайтIа аквазва: «Декьикьаяр инсанрин», «Девлет», «Тезенаг», «Рекьер куьруь жезва», «Ватан», «Гъетерин чиг»… АкI я хьи, гуя ада фикир тагана уьмуьрда гьич са карни, са агьвалатни амукьзавачир. Адан кьатIунар аламатдинбур тир. Нагьакьан гафни, карни ада багъишламишни ийидачир. Гьавиляй ам алай чкадал инсанар нубатсуз рахан тийиз, гаф сивяй чурурна акъудиз алахъдай. Зун шаирдихъ вичихъ галаз таниш тир, заз адан хизанни чидай, гьавиляй завай икI лугьуз жеда.
Гзаф крар рикIел хкизва республикадин библиотекада туькIуьрнавай стендди. Абдул Муталибова, Ибрагьим Гьуьсейновахъ элкъвена, кхьенвай шиир ава:
Рахух, рахух, Ибрагьим, вун: заз ви рахун бегенмиш я.
Тахсир квайдаз заз на вичин чинал лугьун бегенмиш я.
Бажагьат и чилин винел тахсир квачир бенде ала…
Зун ятIа, лап заз зи тIварни на мецел гъун бегенмиш я.
Шаирар я зунни, вунни, са къелемдин юлдашар я.
Заз, чун кьведни галат тийиз, са рекье хьун бегенмиш я…
Ибрагьим Гьуьсейнов чаз гьамиша бегенмиш шаир яз амукьда.
Шихкерим Хъартасви
