Нелай вичин гъилик чирвилер къа­чур аялдин­ рикIе къени гел таз алакь­натIа, вичин гьар са ученик­дай низ гележегдин мумкинвилер ак­вазватIа, абур ачухариз нелай алакь­за­ватIа, гьадаз халисан муаллим лугьуз жеда. Муаллимвал пеше ваъ, майил, рикIин дериндай къвезвай гьисс я. Къе заз вичикай гъвечIи суьгьбет ийиз кIанзавай касни гьа ихьтин  гьевеслу муаллимрикай сад я.

Пешекар сувар алукьзавай йи­къара Махачкъаладин 42-нумрадин юкьван образованидин мектебдин виликан ученикар санал кIватI хьана, чпин сад лагьай муаллим, класс­дин регьбер Гуьлнара Гуьлеметовна Жалиловадиз мугьман хьана.

Муаллимдихъ галаз гуьруьш мектебда сифтегьан классрин корпусда кьиле тухудайвал хьана. Чи виридан рикIер шадвилин  гьиссерив ацIанвай. Яргъал йисар алатайдалай кьулухъ адан сифтегьан ученикар (1-3-классар) чпин рикIера регьимлувилин цIирер тур, гъвечIи чIавалай инсанвал, мергьяматлувал хуьз чирай, гуьруьш гьич гуьзлемиш тавунвай муаллимдиз сувар мубаракиз атанва!

Ахцегьрин юкьван образованидин­ мектеб лап хъсан къиметралди акьал­тIарай Гуьлнаради вичин уьмуьр муал­лимвилин пешедиз бахш авун кьетI­на­. Да­гъустандин госпединститутдин­ (ДГПУ) мектебдиз фидалди тер­бия­­дин­ факультет агалкьунралди акьал­тIа­райдалай кьулухъ ада зегьметдин­ рехъ Махачкъаладин 41-нумрадин аял­рин бахчада башламишна ва кIуьд йисуз кIвалахна. Вири фикирда авайвал кьилиз акъатна: виниз тир образование къачуна, бицIекрихъ галаз кIва­лахни ийиз­ва, амма тамамдаказ разивал гьиссзавачир. Адаз мектебда кIва­лахиз кIан­завай, амма — гъвечIи класс­рин аялрихъ галаз: абуруз неинки кIе­лиз-кхьиз чириз, гьакIни аялар Ватандал рикI алаз, тIе­биат­див, патарив гвай­­бу­рув мукъаятдаказ, кIанивиливди эге­­чIиз чириз. И гьиссер аялрин рикIе­ра гьеле лап гъвечIи чIавалай тун важиблу я.

Вичин и эрзиман мураддивни­ Гуьл­нара Гуьлеметовна агакьна­. 1994-йисуз­ Г. Жалилова Махачкъа­ладин 42-нумрадин юкьван мектебдиз сифтегьан классрин муаллим яз кьабулзава. Ина ада къенин йикъалди кIвалахзава.

Вуч цайитIа, гьам гуьда, ла­гьан­ва­ халкьдин мисалда. 40 йисан тежриба­ авай муаллим Гуьл­нара Жалиловади­ вахчузвай бегьер берекатлуди я. И кардин себебни сирлуди туш: рикI гваз, кIа­ни­­вилелди эгечIай кIвалахдин нетижани хъсанди жеда.

Къенин юкъуз чи сифтегьан муаллим — Жалилова Гуьлнара Гуьлеметовна — гьам вичин амадагрин, мектебдин регьберрин патай еке гьуьрмет ва ихтибар къазанмишнавай муаллим, гьамни  лап хъсан диде ва рикI алай баде я.

Рамил  Абдуллаев