РД-дин транспортдин ва рекьерин майишатдин министерстводи хабар гузвайвал, Дагъустандин дагъдин кьуд район Р-217 «Кавказ» шегьредихъ галаз алакъалу ийизвай ва республикадин дережадинди тир «Мегьарамдхуьр — Ахцегь — Рутул» рехъ ремонт авунин кIвалахрив эгечIнава.
Ремонтдин кIвалахар шегьредин 75-километрдилай 81-километрдал кьван мензилда кьиле тухузва.
«Шегьредин и участокдихъ Мегьарамдхуьруьн, Докъузпара, Ахцегь ва Рутул районар экономикадин ва яшайишдин рекьяй вилик финин жигьетдай акьалтIай еке важиблувал ава. Ада и районрин хуьрер республикадин ва федеральный рекьерин къурулушдихъ галаз алакъалу ийизва», — къейдзава идаради.
«Яшайиш патал къурулушар» милли проектдин сергьятра аваз, ина рекьин винел патан къат цIийи хъувун, кьилди къачуртIа, адан бине мягькемарун, яд ахъайзавай турбаяр дегишарун, рекьин къерехар туькIуьрун ва къир цун фикирда кьунва.
КьетIен фикир рекьера гьерекатдин хатасузвилин месэладиз гуда: къерехдай аскIан цал (барьер), хабар гудай цIийи лишанар эцигда.
Ремонтдин кIвалахар акьалтIарун ва цIийи хъувунвай 6 километрдин рехъ ишлемишиз вахкун алай йисан сентябрдин вацран пландик кутунва.
«Лезги газет»
