Дагъустандин образованидин ва илимдин министерстводин делилралди республикада школадиз фидай яш тахьанвай аялрин идарайрик кутун патал учирда акъвазнавайбурун кьадар 23 агъзур касдилай алатнава. Аялрин бахчайрикай дарвал хьунин месэла региондин Кьил Владимир Васильева абур блок-контейнеррикай (модульный эцигунар) гьазуруналди гьялун теклифна.
Ихьтин серенжем кьабулуни республикада школадиз фидай яш тахьанвай аялрин идарайрикай дарвал хьунин месэла са куьруь вахтунда гьялдай мумкинвал гуда.
Дагъустандин лайихлу эцигунардайди тир Омар Омарован фикирдалди, модульный эцигунар гъиле кьуни республика патал еке мумкинвилер ачухда, гьикI хьи, имаратар йигин еришралди эцигиз ва пулдин такьатар кьенятиз жеда, коррупционерриз пулдин такьатар чуьнуьхдай мумкинвални амукьдач.
Блок-контейнеррикай гьазурзавай дараматрин мягькемвиликай рахайтIа, абурувай 9 баллдин къуват авай залзалайриз дурум гуз жеда.
«Лезги газет»
