И йикъара Къаякент райондин Герга хуьруьн къерехда полициядин къуллугъчи кlвалахал алачир вахтунда кукlунриз элкъвей къалмакъалрик акатна. Кукlунар хьайи вахтунда полициядин къуллугъчиди «Сайга» тфенгдай кьве агьалидиз гуьлле гана. Бедендин жуьреба-жуьре чкайрал хирер хьайи агьалийри чкадал чан гана.

РД-дин МВД-дин пресс-къуллугъди «Лезги газетдиз» хабар гузвайвал, къуллугъдин жигьетдай ахтармишунар тухунин серенжем тайинарнава.

Полициядин къуллугъчи полициядин отделдиз гъана ва ада вичи авур кар хиве кьуна. Адавай чкадин агьалидинди тир «Сайга МК» гъуьрчен яракь вахчуна.

Арадал атанвай агьвалатдихъ галаз алакъалу яз РД-да авай РФ-дин СК-дин СУ-ди РФ-дин УК-дин 105-статьядин 2-пунктунай (кьвед ва адалай гзаф ксар яна кьиникь) уголовный дело къарагъарнава.

Къуллугъдин рекьяй ахтармишунин кlвалахар тухунин нетижада полициядин къуллугъчи ОВД-дин кlвалахдилай алудда ва адаз къанундив кьурвал жазани гуда.

 

Чи мухбир