Гьуьрметлу «Лезги газетдин» редакция!

Квез чар кхьизвайди СтIал Сулейманан райондин Агъа СтIал-Къазмайрин хуьре яшамиш жезвай Ватандин ЧIехи дяведин, зегьметдин ветеран Айнулагь Гьамидов я.

За жуван хайи лезги чIалал акъатзавай газет кхьиз хейлин йисар я. Газетдин кIел тавур са цIарни за тазвайди туш.

Зун, гьар юкъуз газетдал вил алай кас, къе газетдикай магьрум яз тунва. Газет вахчун патал зун са шумуд километр­дин­ мензилдиз кIвачи-кIвачи маса хуьруьз фена кIанзава.

Вири агьалийрал газет, пенсия ахгакьардай кас и чIехи хуьре амач. КIвачер какур хьанвай, гъиле аса авай зун ихьтин четинвиле гьатнава. Садани и кардин кьил кьазвач. Почтадиз атана, вахчу лугьузва газет. «Шехь тавур аялдиз нек гудач» лугьудай мисал ава. Гьадал амална, квек умуд кваз, зун редакциядиз и чар кхьидай фикирдал атана.

Къведай йисузни икI хьайи­тIа, и хуьряй газет кхьизвай агьалийрин кьадар генани тIимил жеда. Чи чIал чна хуьн тавурла, бес ни хуьда?! Чи чIал чна хвена кIанда. Газетди лагьайтIа, и карда важиб­лу чка кьазва. Ам кхьин, кIелун хайи чIал хуьник пай кутазва лагьай гаф я.

ЧIехи Агъа СтIал-Къаз­май­рин хуьре авайди са почтальон я. А касдини хуьруьн са паюнив агакьарзава, муькуь паюник зун квач лугьузва. И чIехи хуьруьн вири кIвалах са почтальондин кIулаз ягъун дуьз туш эхир. Гьамни гьахълу я.

ТIалабда зи гьарайдиз гьай лугьун, герек тир серенжемар кьабулун.

Гьуьрметдивди, Айнулагь­ Гьамидов,

Агъа СтIал-Къаз­майрин хуьруьн агъсакъал.

РД-дин почтадин алакъадин­ Управленидай хабар гайивал,­ виликдай СтIал Сулейма­нан райондин Агъа СтIал-Къазмай­рин хуьре кьве почтальонди­ кIва­лахзавай. Алай вахтунда абурукай са штат агалнава­, кьвед лагьай штатдай поч­таль­онди 0,5 ставка къачуз кIва­лах­зава. Мус и хуьруьз, виликдай хьиз, поч­тальонар патал 2 штат чара хъийидатIа, малум туш. «Лезги­ газетдин» редакция Айнулагь Гьамидова вичин чарче къара­гъарнавай месэла гьялдай маса рекьер жагъуриз алахъда.