Къенин зи суьгьбет СтIал Сулейманан райондин центральный библиотекайрин къурулушдин (ЦБС) директор Шихбабаева Назила Мегьамедовнадикай я.

Ам Алкьвадрал дидедиз хьана. 1984 йисуз ада хуьруьн юкьван школа, 1988-йису­з Да­­гъустандин госуниверситетдин библио­те­кай­рин факультет агалкьунралди акьалтIар­на. Зегьметдин рехъ ада гьа 1988-йисуз Да­гъустандин пединститутда библиотекада  кIвалахунилай башламишна.

1989-йисуз Н. Шихбабаева СтIал Сулейманан райондин центральный библиотекайрин агьалийриз къуллугъдай отделдин заведующийвиле тайинарна. Жавабдар и везифаяр ада 32 йисуз намуслудаказ, агьалийрин патай гьуьрмет аваз кьиле тухвана. 2021-йисуз Назила Мегьамедовна ЦБС-дин директорвиле тайинарна. Ада чаз лагьайвал, ЦБС-дик хуьрера кардик квай 27 филиал акатзава.

Назила Мегьамедовнадин кIвалахдин тежриба, чирвилерин дережа, истемишунар­ себеб яз, неинки центральный библиотекадин, гьакI хуьрера кардик квай адан филиалрин кIвалахдани хъсанвилихъ еке дегишвилер кьиле фена. Нетижада ЦБС республикада хъсанбурукай сад я.

Идалайни гъейри, ЦБС-ди гьар йисуз республикадин ва федеральный проектрани иштиракзава. Мисал яз, библиотекайрин къурулушди «Пушкинан  карта», «Россия­дин хал­кьарин Садвилин йис», «Кьасумхуьрел СтIал Сулейманан багъ аваданламишунин­ проектра иштиракна.­ Ибурук, гьелбетда, ЦБС-дин директор Нази­ла Ме­­гьа­медовнадин еке пай ква.

Къейд ийиз кIанзава хьи, ЦБС-дин хъсан кIва­­­лахдиз килиг­на, адаз фе­деральный, рес­­публи­ка­дин ва муници­пальный бюджетрай пу­лунин такьатарни ахъай­зава.

– Чаз ахъайзавай­ пулунин такьатри ЦБС-дин материально-техни­ческий база мягькемару­низ, тадаракар маса­ къа­чуниз, ремонтрин кIвала­хар кьиле тухуниз, работникриз премияр гуниз, гьар жуьредин мярекатар кьиле тухуниз, проектра ва райондинни республикадин мярекатра иштиракуниз, гьакIни чкадал юбиляррин, машгьур алимрин, писателрин, шаиррин юбилейрин мярекатар  кьиле  тухунин  карда  куьмекзава. Ихьтин дикъет ва куьмек гунай чна райондин кьил Саид Темирхановаз, культурадин отделдиз, амай къурулушрин регьберриз, меценатриз рикIин сидкьидай сагърай лугьузва, – разивилелди къейдзава вичин пешедал рикI алай Назила Мегьамедов­нади.

Назила Шихбабаевадин яргъал йиса­рин намуслу зегьмет РД-дин культурадин минис­терстводин (2017-йис), «Умуд» фондунин (2021-йис), РД-дин Гьукуматдин­ (2021-йис), Лезги писателрин союздин (2025-йис) ва маса гзаф грамотайралди къейднава.

Мукьвара Назила Шихбабаевадиз «Да­гъустан Республикадин культурадин лайих­лу работник» лагьай тIвар гана. Шабагь адав Дагъустандин культурадин министр За­рема Бутаевади шад гьалара вахкана. Мубаракрай!

Фадлай чаз хъсан инсан, пешедиз вафалу регьбер яз чизвай Назила Мегьамедовна гьакI кIвалин къул хуьзвай кайвани, район, общество патал вафалу пуд веледдин дидени я. ИкI, гьуьрмет, берекат авай и хизандай тир руш Гуьзелагъади духтур-невролог яз кIвалахзава.

Ахлакьдинни низамдин рекьяй чпин диде-бубадал атанвай Ислама ва Саида чпин пешейрай кIвалахзава. Назила Мегьамедовнадиз рикIин шадвал, руьгьдин таъминвал, рикI алай пешеди, ферли 3 веледди хьиз, кьуд хтулдини гузва.

Хазран  Кьасумов