И йикъара Ахцегь райондин администрацияда райондин кьил Осман Абдулкеримова жавабдар къуллугъчийрихъ галаз санал нубатдин совещание кьиле тухвана. Идакай «Лезги газетдиз» райадминистрациядин пресс-къуллугъди хабар гана.

Йикъан месэлаяр веревирдунив эгечIдалди вилик, райондин кьили кIватI хьанвайбур районрин уртах ОВД-дин начальникдин цIийи заместитель Ислам Бекеровахъ галаз танишарна.

Совещанидал эменнидин ва чилерин налогар кIватIунин, чилер актуализация авунин кIвалахар кьиле физвай гьалдикай экономикадин ва чилерихъни эменнидихъ галаз алакъалу отделдин начальник М.Кьасимова ихтилатна.

Гуьгъуьнлай рахай образованидин управленидин начальник С.Назарова 2018-2019-кIелунин йисан нетижайрикай, кьилди къачуртIа, районда ЕГЭ, ОГЭ кьиле фейи гьалдикай, имтигьанар вахкайбурун кьадардикай суьгьбетна. Малум хьайивал, 80-100 балл къазанмишуналди, 20 выпускникди лап хъсан нетижаяр къалурна. 10 выпускникди мектеб къизилдин медалдалди куьтягьна.

Эцигунрин ва сад тир заказчикдин управленидин начальник М.Гьажиев райондин мулкара кар алай проектрай кьиле физвай эцигунринни ремонтрин кIвалахрал акъвазна. Къейд авурвал, 25-августдалди мектебрин дараматра кьиле физвай ремонтрин кIвалахар акьалтIарда.

Райондин кьилин заместитель Алмас Шуаева жавабдар къуллугъчийрин фикирдиз райондин 90 йисан юбилей къейдунихъ галаз алакъалу мярекатриз гьазур хьунин месэла гъана.

Эхирдай райондин регьберди алатай совещанидал къарагъарай месэлаяр гьикI гьялнаватIа, гьа кар ахтармишна ва бязи тапшуругъар гана.

«Лезги газет»