Экуь-рехи, мичIи-рехи ва яруни шуьт­руь рангарин чIар алай и маймундиз Немеядин тонкотел лугьузва. Кьуьнтелай гардандал кьван лацу рангунинбур я, бедендин яргъивилел 55-61 сантиметр жеда, тумунин яргъивилел — 55-76 сантиметр. Заланвал вини кьил 11 килограммдив агакьда.

Вьетнамдинни Лаосдин тамара га­пIал-гапIал хьана яшамиш жезвай и маймунрин уьмуьр 25 йисуз кьван давам жеда. ТIебиатдал къаравулвалзавай вири­ халкьарин дережадин союзди Немеядин­ тонкотелар терг жезвай (яни дуьньядилай квахьзавай, амукь тийизвай) гьайванрин жергедай яз гьисабзава.

И маймунар йикъан уьмуьр тарара кьиле тухузвай, гьанра ксунни ийизвай гьайванар я. ТIуьнни ксун тарара ийиз­вайвиляй абур саки чилел эвичIзавач. Асул гьисабдай абуру тарарин пешер нез­ва. ГьакIни емишар, набататрин кьилер, тумар, цуьквер, хвехвер неда. Яд саки хъвазвач — набататрик квай кьеж абуруз бес жезва.