Дагъустандин Кьил Сергей Меликова­ 5-августдиз республикадин гьукумдин органрин ва муниципалитетрин администрацийрин кьиле авайбурухъ галаз совещание кьиле тухвана. Анал кар алай са шумуд месэла веревирдна: республикада улакьар гьалдай ва яракь маса къачудай ихтиярар къачун патал справкаяр гузвай медицинадин идарайрин кьадар артухарун, гьукумдин органар агьалийрин патай къвезвай арзайриз вахтунда килигун, мектебар кIелунин цIийи йисаз гьазур хьун ва масабур.

Совещанидал Сергей Меликова мукьвара Хунзах райондай вичел агакьнавай са хабардин гьакъиндай наразивал къалурна.

«Куь хсуси эменнидик акат тийизвай, вири республикадин, халкьдин хсусият тир чкайрин, затIарин куьмекдалди къазанмишунал эхир эциг», — лагьана Сергей Меликова, муниципалитетрин кьилерихъ элкъвена.

Гьихьтин хабарди республикадин Кьилик ажугъ кутуна? Малум тирвал, Хунзах­ районда авай «Лацу дурнаяр» мемориал­диз килигиз кIанзавайбуру къанун-къай­дадал амална кардик кутунвай касса­дай билетар маса къачузва. Амма бязи­ чешмейрин делилралди, и кассадилай гъейри, аниз къвезвай мугьманривай пул кIватI­завай хъендик квай маса кассаярни кардик квай. Эгер и месэладиз Сергей Меликова фикир ганатIа, ихьтин малумат раижнавай чешмеяр ихтибар ийиз жедайбур я.

Пул къачудайла хьиз, мемориалдихъ гелкъведайлани, гьевес хьанайтIа, гьикьван хъсан тир. Совещанидал хабар гайивал, мемориалда кардик квай музейда лазим дережада низам-къайда хуьзвач, я дараматдин патав гвай мулкарихъни гелкъвезвач.

Сергей Меликова и мемориалдихъ Дагъларин уьлкведин меденият патал авай важиблувал ва ана гьамиша къайда хьун шартI тирди къейдна. Ада гьакIни талукь идарайрин векилрал «Лацу дурнаяр» комплексда ахтармишунар кьиле тухун тапшурмишна. Абурун нетижайрилай мемориалдин жавабдар ксарин кIвалахдин кьисмет аслу жеда.

Чи мухбир