Квез и шикилдай аквазвай гъвечIи рушахъ художественный гимнастикадал рикIивай машгъул жезвай Наира Нисредовадихъ галаз чун са йис идалай вилик таниш хьанай. Алатнавай вахтунда ада 10-далай виниз жуьреба-жуьре акъажунра иштиракна, виринра кIвенкIвечи чкаяр кьуна. Абурун арада и йикъара Кеферпатан Осетия-Аланиядин меркез Владикавказда, 400-дав агакьна жаванрин иштираквал аваз, кьиле фейи акъажунарни ава. Яшарин са шумуд категориядиз пай хьана, аялри чпин алакьунар къалурай и акъажунра чи рушан устадвили судьяяр, кIватI хьанвай тамашачияр гьейранарна.
Къейд авун лазим я хьи, Каспийскда майдиз кьиле фейи «Каспий гьуьлуьн Кубок» акъажунра 1-чка къазанмишуни Наирадиз республикадилай къеце кьиле физвай акъажунра иштиракдай мумкинвал гана.
РикIел хкин: Наира художестенный гимнастикадал машгъул жез 3 йис я. Ам Р. Гьамзатован тIварунихъ галай ДГПУ-дин муаллим Насрудин Нисредован хизанда 2018-йисуз дидедиз хьана. Абурун ери-бине СтIал Сулейманан райондин ЦIарахрин хуьряй я. Алай вахтунда Наиради «Ак-Барс» клубда тренер Ралина Кутламбетовадин гъилик вичин устадвал хкажзава. Гьа са вахтунда школадизни гьазурвал аквазва. Наирадин гафарай малум хьайивал, художественный гимнастикадал машгъул жез са тIимил вахт алатайла, къазанмишай сифтегьан агалкьуни адан гьевес мадни хкажна. Адаз вичин уьмуьр художественный гимнастикадихъ галаз алакъалу ийидай мурад ава. Идалай виликни къазанмишнавай агалкьунри адахъ бажарагъ авайди къалурзава. Кьилди къачуртIа, Каспийскда шегьердин ачух кIвенкIвечивал, Нальчикда СКФО-дин кIвенкIвечивал патал ва республикадин клубрин арада кьиле фейи акъажунра (ана 450-далай виниз аялри иштиракна, Наиради 2018-йисуз ханвай аялрин арада СКФО-дин кIвенкIвечивилин тIвар къазанмишна) ада 1-чкаяр кьуна.
Умудзава хьи, дуьньядин спортдин кесерлу майданрани Наиради вичикай хабар гуда.
Рагнеда Рамалданова
