МВД-дин хроникадай
УстIар хьанач, тапархъан хьана
Дагъустандин Огни шегьердин полицейскийри мебель гьазурзавай устIар я лугьузвай тапархъан тайинарна. Идакай РД-дин МВД-дин пресс-къуллугъди хабар гузва.
Полициядин къуллугъчийри 45 йисан яшда авай махачкъалавиди авунвай лутувилин делил дуьздал акъудна. Геле къекъвена ахтармишайла тайин хьайивал, агьалиди мебель кIватIунин, чкадал эцигна тайинарунин жигьетдай тапан малумат раижна, гьакъикъатда ам ихьтин кардал садрани машгъул хьанач. Гьа са вахтунда ада тапан малуматда вичин ваъ, дустунин делилар къалурнавай. Дустунихъ лагьайтIа, гьакъикъатдани мебель гьазурзавай цех авай.
Шкаф-купе гьазурунин заказ кьабулна, «устIарди» умуми гьакъидин са пай виликамаз гун тIалабна. ИкI, муьштериди адаз 55 агъзур манат гана, амма «устIар» алакъадал экъечI хъувунач.
И делилдай РФ-дин УК-дин 159- статьядин 2-паюнай уголовный дело къарагъарнава.
Ктабар тергна
Махачкъалада чирвилер гудай къалп ктабар акъудунин вилик пад кьуна. Ихтилат 2 миллион манатдин зарар гайи къалп ктабар терг авуникай физва.
Дагъустандин МВД-дин УЭБиПК-ди тадиз кьабулай серенжемрин нетижада къанунсуздаказ ктабар акъудай чапхана дуьздал акъудна. Чапхана кирида кьунвайда а ктабар маса гун патал гьазурнавай, гьа жергедай яз машгьур маркетплейсдайни.
Чапханадин дарамат ахтармишай вахтунда полицейскийриз ингилис чIалаз талукь кхьинардай дафтарар ва абурал акьалждай жилдер жагъана. Абур еридин жигьетдай стандартрив эсиллагь кьазвачир. Абур акъудунин ва раиж авунин кьетIен ихтиярар анжах «Издательство «Просвещение» АО-диз ава. «Просвещение» чапханадиз хьанвай зарардин кьадар 2181670 манат яз гьисабзава.
Шак физвай 30 йисан яшда авай Махачкъаладин агьалидиз талукь яз, РФ-дин УК-дин 146-статьядин 3-паюнин «в» пунктуна къалурнавай тахсиркарвилин лишанрай уголовный дело къарагъарнава.
Гьафтедин аварияр
РД-дин МВД-дин госавтоинспекцияди хабар гузвайвал, 28-сентябрдилай 4-октябрдалди Дагъустандин мулкара улакьрин 24 ДТП арадал атана.
Машинар гьалзавайбуру мукъаятсузвал авунин, къайдайрал амал тавунин нетижада 14 йикъан муддатда 1 кас кьена, 36-дал (абурукай 4 аялар я) гьар жуьредин хирер-кьацIар хьана.
МВД-дин къуллугъчийри машинар гьалзавайбуруз мад сеферда мукъаятвал хуьниз эвер гузва.
"Лезги газет"