МВД-дин хроникадай
Гьафтедин аварияр
РД-дин МВД-дин госавтоинспекцияди хабар гузвайвал, 14-сентябрдилай 20-сентябрдалди Дагъустанда улакьрин 29 ДТП арадал атана. Гьафтеда хьайи аварийрин нетижада 10 кас кьена (абурукай 1 аял я), 33-дал (абурукай 5 аялар я) гьар жуьредин хирер-кьацIар хьана.
МВД-дин къуллугъчийри машинар гьалзавайбуруз рекьера гьерекат авунин къайдайрал амал авуниз мад сеферда эвер гузва.
Белоруссиядин ватандаш кьуна
И мукьвара Дагъустандин МВД-дин УКОН-дин (управление по контролю за оборотами наркотиков) къуллугъчийри Махачкъалада 24 йисан яшда авай Белоруссиядин ватандаш ахтармишай вахтунда адав гваз хьайи лацу рангунин затI дуьздал акъатна. Полицейскийри ам вахчуна ва экспертизадиз ракъурна. Малум хьайивал, 1063 граммдин заланвал авай и затI мефедрон яз хьана. Шак физвайди яшамиш жезвай чка ахтармишай вахтунда гьанайни наркотик жагъана – 787 грамм эфедрон.
РФ-дин УПК-дин 91-статьядал асаслу яз кьунвай шак физвайда гъавурда турвал, синтетикадин наркотик ада Махачкъаладин жуьреба-жуьре адресра маса гун патал хуьзвай.
РФ-дин УК-дин 30-статьядин 3-паюнай, 228.1-статьядин 5-паюнай уголовный дело къарагъарнава.
Гужуналди къакъудиз кIанзавай
Махачкъаладин Кирован райондин полициядин къуллугъчийри тайинарайвал, Семендер поселокда 26 йисан яшда авай чкадин агьалиди, 38 йисан яшда авай гьа и поселокдай тир агьалидивай гужуналди «Lada Priora» машин ва 10 агъзур манат пул къакъудиз кIан хьунин алахъунар авуна.
Шак физвайди РФ-дин УПК-дин 91-статьядал асаслу яз кьуна.
Ада ихтилат авурвал, агьвалат кьиле фейи юкъуз адал дуьшуьшдай улакьда аваз вичин дердийрин гуьгъуьниз физвай таниш гьалтна. И чIавуз садлагьана адаз вичизни машин герек хьана, амма вичикай машиндин «иеси» авун патал ада нагьакьан рехъ хкяна. Ада вичин танишдавай машин вичив вахкун истемишна, амма иесиди и кар кьабулнач. Рахунар гьасятда кукIунриз элкъвена, нетижада къалмакъалдик кьил кутурдалай машиндай документар ва пул вахчуз алакьна.
РФ-дин УК-дин 163-статьядин 2-паюнай уголовный дело къарагъарнава.
"Лезги газет"