Гатана, къакъудна
И йикъара Махачкъалада таланчивал авунай шак физвайбур кьуна. 5-июндиз Советский райондин полициядин отделдин дежурный частунив ихьтин хабар агакьна: экуьнин сятдин кьудаз къад декьикьа кIвалахнавай чIавуз Алиеван куьчеда малум тушир ксари 34 йисан яшда авай шегьердин агьали гатана ва адав гвай мобильный телефон (20 агъзур манатдин къиметдик квай), 120 агъзур манат пулни чуьнуьхна.
Уголовный розыскдин къуллугъчийри шак физвай вад кас кьунва, абур 18 йисалай 23 йисал кьван яшара авай жегьилар я.
РД-дин МВД-дин пресс-къуллугъди хабар гузвайвал, агьвалатдин патахъай ахтармишунар давам жезва, уголовный дело къарагъарунин месэла гьялзава.
42 авария
Дагъустандин МВД-дин Госавтоинспекцияди хабар гузвайвал, 1-июндилай 7-июндалди республикадин рекьера 42 ДТП хьана. Нагьакьан агьвалатрин нетижада 5 кас кьена (абурукай 1 аял я), 61 касдал (абурукай 6 аялар я) гьар жуьредин хирер-кьацIар хьана.
Госавтоинспекциядин къуллугъчийри машинар гьалзавайбуруз рекьера гьерекат авунин къайдайрал амал авуниз, мукъаятвал хуьниз, жавабдарвал аннамишуниз эвер гузва.
«Лезги газет»
