Къалп нумра ва яракьар
И мукьвара ГИБДД-дин ДПС-дин къуллугъчийри Махачкъаладин М. Гьажиеван куьчеда документар ахтармишун патал «Toyota Camry» машин акъвазарна. Нетижада 29 йисан яшда авай агьалиди гьалзавай машиндин нумра (государстводин регистрациядин лишан) тапанди тирди дуьздал акъатна.
Улакь ахтармишайла, полицейскийриз анай «Glock» тапанчи, «TG2» автомат ва абуруз талукь патронар жагъана. Ибурулайни гъейри, машинда тIвар алачир 40 таблетка авай. Машиндин иесидиз медицинадин рекьяй адан гьалдиз килигун теклифна, амма ада и кардикай кьил къакъудна.
Машин гьалзавайдаз талукь яз РФ-дин КоАП-дин 12.26-статьядай, 12.2-статьядин 4-паюнай ва 12.5-статьядин 3-паюнин 1-пунктунай административный материалар кIватIнава. Улакь махсус чкадиз хутахна. Шак физвайди полициядин отделдив агакьарна. Уголовный дело къарагъарунин месэла гьялзава.
55 агъзур манат чуьнуьхна
Майдин эхирра полициядин «Дубкинский» дежурный частуниз Краснодардин крайдин 56 йисан яшда авай агьалиди арза авуна.
Ихтилат авурвал, ЦIийи Зубутли хуьре авай машгъулатрин комплексдин патав ада вичин машин акъвазарна, вич са кьадар вахтунда са гьиниз ятIани фена. Элкъвена хтайла, адаз вичин 55 агъзур манат жагъун хъувунач.
Полициядин къуллугъчийри угъривал авунай шак физвайди кьуна. Ам Махачкъаладин 28 йисан яшда авай итим я. Ам тIвар кьунвай хуьруьз ял ягъун патал хизанни галаз фенвай. Машиндин патавай фидайла, ана авай кисе акурди ада хиве кьуна. Киседа нагъд пул аваз акурла, агьалиди, машиндин ахъазвай дакIардай гъил туна, киседа авай пул ялна, ахпа Махачкъаладиз хъфена. Адан гафаралди, чуьнуьхай вири пул бурж вахкуниз ва машин ремонт авуниз серфна.
Тахсиркарвилерин лишанриз килигна, РФ-дин УК-дин 158-статьядин 2-паюнин «в» пунктунай (угъривал) уголовный дело къарагъарнава.
«Лезги газет»
