2024-йисуз «Дагъустан Республикадин экспортдиз куьмекунин центр» АНО-ди региондин гъвечIи ва юкьван карчивилин карханайри къецепатан уьлквейриз суьрсет маса гунин рекье ийизвай кIвалахдиз ва санлай къецепатан уьлквейрихъ галаз алишверишдин алакъаяр гегьеншаруниз активнидаказ куьмекзава.
ИкI, федеральный «МСП-дин субъектар йигин еришралди еримлу авунин» проектдин сергьятра аваз, Центради юкьван ва гъвечIи карчивилин 126 субъектдиз куьмек гана.
Асул агалкьунрикай яз къейдзава: 12 карханадиз къецепатан уьлквейрай муьштерияр жагъуриз куьмек ганва; са карханадиз экспортдин икьрарар кутIунунин карда кьиляй-кьилиз куьмекнава, чкадин компанийри Москвада, Алматада, Тегеранда, Дубайда, Къиргъизистанда, Азербайжанда, Туьркияда, Оманда ва Саудрин Аравияда тешкилай международный выставкайра ва алишверишдихъ галаз алакъалу мярекатра иштиракиз куьмек ганва; Азербайжандиз, Эрменистандиз, Ирандиз ва са жерге маса уьлквейриз метягь агакьарунин жигьетдай икьрарар кутIуннава.
Центради алай йисуз гьакIни «Экспортдин навигатор: Дагъустан 5.0» конференция тешкилна — ам уьлкведин экономика сергьятламишунин серенжемрин басмишуник квай шартIара карчивал кьиле тухунин месэлайриз талукь тир. ГьакIни идаради цIи «Йисан экспортер» конкурсдин нетижаяр кьуна, гъалибчийриз шабагьар гана. ГъвечIи ва юкьван карчивилин 20-далай гзаф субъектри республикадин районра кьиле фейи мярекатра иштиракна.
ИкI, идаради дамахдивди къейдзавайвал, 2024-йисуз Центради Дагъустандин карчийри республикадин мулкунал гьасилзавай суьрсет къецепатан уьлквейриз маса гунин кIвалах гегьеншарунин ва абур международный базарриз экъечIиз куьмек гунин рекье виле акьадайвал зегьмет чIугунва.
Амина Муслимова
