Зун гьамиша гьейрандиз тамашдайди тир Ахцагьрин куьгьне Николаян береда эцигнавай муькъуьз, адан кIаникай физвай вацIуз. Анлай ахпа зун хкаж хьана фидайди тир тик ,акIай магьлейрай винелди зи танишрин кIвализ.
РакIарал зун Селема къаршиламишна ,амма зун кIвалин къенез гьахьнач. Адан айвандин вилик къуьншидин вили шим алай кIвалин къав квай, заз пара хуш хьана и ери зун анал акъваз хьана, анлай заз хуьр капун юкьвал алайди хьиз аквазвай. Инал куьгьне жуьредин бицIи назбалчияр алаз гебе ачух тир.Зун инал ацукьна тамашиз хьана кьуд патаз, а муькъуьз ,адан кIаникай кIевиз вич вичик рахаз- рахаз катзавай вацIуз, и арада мяув ийиз яваш яваш цIару шемпIини атана ацукьна зи патав
Селема самоварда чай гьазурзавай , гумадин ни заз пара кIанда,туп -туп акъатзавай гумадин маргъалар яваш яваш алчуд жез сад садал аруш жез дагъдин кьилел алай лацу булутрив акахьзавай… Яраб и мукъкъвелай гьикьван инсанар фенатIа II0 йисуз? Заз аквазвайди са пад я хуьруьн,муькуь патаз пака фида тамашиз за жуваз икьрар авуна,зун вилик экIягъай суфрадиз мукьва хьана.Заз са затIни кIанзавачир белки рекьи гьелекна жеди ,я туш инин михьи гьавди зи гуьзуь ацIурнавай .Зун инал явашдиз ахварал физ башламишна…
ВацIун шагьварди зун фад ширин ахварал ракъурна ,вилик са хупI тавур чайни кумаз . Ахварай заз вири хуьруьн ванер ,сесер къвезвай.Зун Селема динж тунач,эхир ада ястух гъана зав вугана вацIун шагьварди заз мекьи ийида лагьана винелай са чими пекни вегьна -де ксус кIамай кьван жуваз лагьана, ам кIвализ гьахьна.
Рагъданин ракъини вичин зарлу сачахарин булут зи къуьнерал туна ам дагъларин кьулухъ Кьурагь галай патахъ чуьнуьх хьана.Ахпа цавун аршдиз ацIай варз акъатна вичин къвалал табий гъетерни галаз.Вич са лупIни тийиз заз тамашзавай ,амма туракь гъетери цIапIрапIарзавай зи желб чпел чIугуна.Акьван гъетериз зун тамашзава ,яраб абуруз зун аквазватIа и къавал алай? Зи фикирриз мад машатна Селеман дидеди,ада гила зи вилик нянин тIуьн гъана. За анжах са цукIрадавай фири нек хъвана .Йиф яргъал фирдивай гъетер гуя чилиз мукьва хьанваз аквазвай ва ишигъни экъитIай алуван хьанвай. Геж йифен вацIун ванни масади тир.На лугьуди ,ам секиндиз авахьзавайж,инсанрин ахвар хан тийидайвал …Зи ширин ахвар рушани дидеди хана ,зун тIебиатдин гуьзелвиликай магьрумна , абуру зун гужуналди кIвализ хутахна мес къалурна.
Зун пакамахъ ваъ ,югъ часпардал атайла ахварай аватна ,амни абурун къуьншидал алай аялрин ванцелди .Гила зун михьиз уях хьана.Гьайиф а йиф суьгьуьрлу тир ,фад акъатнай…Заз кIандай ина мад са йиф акъудиз…
Гьайиф а ширин йиф авур кIвалин къавал къе пуд мертеба хкажнава.
Къе а муькъуьн хиве вацIуз дикъетдади тамашиз Шарвили акъвазнава.Ам гуя хуьруьн руьгьдин айкал я.Зун ада винелди акъайнач.Зи фикирар гила адакай хьана.За гила адакай жуван гьиссералди риваят кхьизва.Фикирри зи ахвар къакъудайтIани заз Шарвилидин руьгьди вичи гуда къуват зайиф тежедай садрани санани я садан виликни…
Муькъуьн хивел акъвазнава Шарвили
Дикъетдалди тамашзава Самурдиз…
Бикеханум Алибекова, шаир
