Алай йисан августдин вацра багъри “Лезги газетдин” виш йисан юбилей къейд авун, вири дустари хьиз, зани вилив хуьзвай. Гьайиф хьи, бязи себебар аваз, а югъ вичин вахтунда къейд ийиз хьанач. Умуд кутазва гьа мумкинвални чаз жеда.
Гьелбетда, виш йис им са куьлуь вахт туш, ам камаллувилин яшдин девир я. И девирда газетди вичин кIелчияр, са шумуд несил, вахт-вахтунда уьлкведа, чи республикада, чи лезги районра авай агалкьунрикай,яшайишдин,сиясатдин, общественный уьмуьрдин цIийивилерикай хабардар авуна. Ам ихтилатчи, суьгьбетчи хьана.
Иллаки эхиримжи йисара газетди чи алатай девиррин тарихдикай, чи баркаллу ватанэгьлийрикай малуматар, чи эдебиятдикай, медениятдикай чирвилер гузва. Ватандиз, халкьдиз къуллугъзава. Идан патахъай газет кхьизвайбурун кьадарди шагьидвалзава. И жигьетдай ам республикада вилик жергейра авайдини чаз малум я. И карди чак — адан кIелчийрик — дамахдин гьиссер кутазва.
Хуьруьн агьали яз, заз аквазва хьи, яш хьанвай инсанри гьикI газет вилив хуьзватIа, гьикI кIелзаватIа. Жегьилри лагьайтIа, адан электронный вариантдикай менфят къачузва, соцсетра авай материалар кIелзава.
Зини газетдин алакъайрикай лагьайтIа, заз жув чир хьайидалай кьулухъ чи кIвализ газет хтана. Гьатта сифте гьарфарни за газетдай чирна. Бубадин кIвале авай газет кхьинин, ам кIелунин адет гъуьлуьн кIвализ атайлани давамарна.Газет кIвализ хтунни за сифте литературадин чин кIелда, ахпа — амай материалар.
Литературадин материалар за гьамиша итиж аваз кIелзава. Вахтар-йисар къвез алатна, жуван фикирарни газетдал ихтибар авун кьетIна. Гьа икI 2019-йисан cентябрдин вацра зи сад лагьай макъала «Дагълар рикIе амаз» газетда чап хьана. Адалай гуьгъуьниз газетдиз мукьвал-мукьвал зи шиирар, макъалаяр акъудзава. И кардай за газетчийриз пара кьадар сагърай лугьузва.
Адет яз, юбилеяр мубарак ийида.Зани багъри газетдин 100 йис тамам хьун сифтени-сифте зи дахдиз (гьам я заз газетдин тIям чирайди, ам кIанарайди), ахпа газетдин коллективдиз ва газет кIелзавай вирибуруз мубаракзава.. Яшамишрай “Лезги газет”!..
Тамила Салманова,
Бут-Къазмайрин юкьван школадин муаллим
