Алатай гьафтеда 2023-йисуз илимдин, техникадин, эдебиятдин, публицистикадин, искусстводин ва артхитектурадин хилера гьукуматдин, 2025-йисуз Расул Гьамзатованни СтIал Сулейманан тIварарихъ галай премийрин сагьибар малум хьана.
ИкI, Дагъустандин Кьил Сергей Меликован Указдалди гьукуматдин премийриз лайихлу хьайибурун арада чи ватанэгьлийрикай рагьметлу алим Шайдабег Мирзоев («Культура и традиции Дагестана» предметдиз талукь чирвилеринни методикадин кIвалахрай — кьейидалай кьулухъ), гьикаятчи Наира Алиева (аялар патал кхьенвай «Мамины сказки» ктабдай) ава.
Р.Гьамзатован тIварцIихъ галай премиядиз табасаранрин шаир Сувайнат Исрафилова (шииррин «Ангел мой последний» ктабдай) ва даргийрин шаир Айша Къурбанова (шииррин «Избранное» ктабдай) лайихлу хьана. Абуруз гьар садаз 150 агъзур манатдин кьадарда аваз пулдин пишкешар гуда.
Хейлин йисар алатайла, Сергей Меликован Указдалди мад сеферда арадал хкай СтIал Сулейманан тIварцIихъ галай премиядин сагьибрин арадани кьве кас ава: табасаранрин шаир Эльмира Ашурбегова (шииррин «Молитвы любви» ктабдай) ва лезгийрин жегьил шаир Владик Батманов (шииррин «Лекьрен муг» ктабдай). Абурузни гьар садаз 150 агъзур манатдин кьадарда аваз пулдин пишкешар гуда.
Чна гьукуматдин патай премийриз лайихлу хьанвай чи ватанэгьлийриз и вакъиа мубаракзава ва абурухъ мадни еке агалкьунар хьун алхишзава.
«Лезги газет»
