ВикIегь бубадихъ викIегь рух­ваярни жеда, — лугьузва лез­гийрин мисалда. СтIал Сулейманан райондин Кьулан СтIал­рин хуьряй тир Нежведил­ Шагьпазован хизанда чIехи хьайи Физовудин Шагьпазовни гьа ихьтин викIегь рухвайрикай­ сад я. Вич Ватандиз вафалу­ кье­гьал тирди ада, женгчи-ин­тернационалист яз, Афгъанистанда кьиле фейи вакъиай­ра иштиракдайла, субутна. Чешнелудаказ интернационалистдин буржи тамамарунай адаз жуьреба-жуьре шабагьарни гана. Абурун арада СССР-дин Верховный Советдин Президиумдин грамотани ава.

Гьеле жегьилзамаз лигим хьайи Физовудин Шагьпазова­ гуьгъуьнлай жуьреба-жуьре ида­райра, карханайра зегьмет чIу­гуна. Эхиримжи йисара ам жемиятдин месэлайрал машгъул жезва. Ам РФ-дин юстициядин министерстводин къаюмвилик кваз арадал гъанвай ришветбазвилиз аксивалдай комитетдин, РД-да авай Росгвардиядин ветеранрин Советдин, Махачкъала шегьердин администрациядин патав гвай агъса­къалрин Советдин президиумдин член я. Къейд ийин хьи, цIи Ф. Шагьпазоваз Дагъустанда­ къанун-къайда хуьнин кардик пай кутунай винидихъ тIвар кьур ришветбазвилиз аксивалдай комитетдин патай анин регь­бер П.И. Дорогован къул алай Ра­зивилин чар гана.

Физовудин Шагьпазова республикадин меркезда кьиле физвай лезги халкьдин гзаф мярекат­ра иштиракзава, акьалтзавай несилдин векилриз пешекарвилин ре­кьяй меслятар къалурзава, ­уьмуьрдин гьар камуна ватанпересар яз амукьуниз эвер гузва. Ихьтин камаллу насигьатар гузвай кас вични чIехи ватанперес я. Физовудин Нежведиловича икI тирди гьеле жегьилзамаз субутна. Гаф кватай чкадал лагьана кIанда, чи макъаладин игитдиз Аллагьдин патай яратмишунардай пайни ганва. Месела, ам Дагъустандин МЧС-дин «Хайи Дагъустандиз савкьат» гимндин чIаларин автор я.

И йикъара Физовудин Неж­ведиловичан 65 йис тамам жезва. Уьмуьрдин чагъинда­ авай бере. И шад вакъиа адаз мукьва-кьилийри, санал кIва­лах­завай юлдашри, ярар-дус­тари мубаракзава. Абурухъ галаз санал чнани Физовудин Шагьпазовахъ яргъи уьмуьр, чандин сагъвал хьун алхишзава:

Мубаракрай хайи югъ

Кьегьал хциз Ватандин!

Юбилей хьуй виш йисан

Сагъламвални — кIубанди!

Айшат  Рашидова, ДГУ-дин магистрант