7-мартдиз СтIал Сулейманан районда яшайишдин жуьреба-жуьре хилера гьакъисагъвилелди зегьмет чIугунин карда тафаватлу хьайи дишегьлийрив шабагьар вахкуниз талукьарнавай мярекат кьиле фена. Ана муниципалитетдин кьил Саид Темирханова, РД-дин милли сиясатдин ва динрин крарин рекьяй министерстводин векил Заур Уружева, машгьур меценат Нариман Гъазалиева ва масабуру иштиракна.
Мярекатдал Нариман Гъазалиева Ахцегь, Докъузпара, Мегьарамдхуьруьн, СтIал Сулейманан ва Кьурагь районрай тир лезги чIалан муаллимризни медениятдин векилриз (саки 20 касдиз) вичин патай пулдин пишкешар гана. Заур Уружева абурув министерстводин патай разивилин чарар вахкана.
Къейд ийин хьи, Нариман Гъазалиева мергьяматлувилин серенжемар кьиле тухуз гзаф йисар я. Эхиримжи вахтара ада республикадин образованидин хилез талукь проектар кьилиз акъудуниз пулдин такьатар чара ийизва. Кьилди къачуртIа, адан куьмекдалди олимпиадаяр, конкурсар, жуьреба-жуьре маса мярекатар тухузва. ЦIи «Лезги газетдин» редакцияди Каспийск шегьерда лезги чIалай кьиле тухвай олимпиадани Н.Гъазалиеван куьмекдалди тешкилнавай.
Чи мухбир
