Дишегьлийрин международный йи­къан сергьятра аваз, алай йисуз СтIал Сулейманан райондин администрацияда кьиле фейи шадвилин мярекатдал гьакъисагъвилелди зегьмет чIугунай, яшайишдин жуьреба-жуьре хилера активнидаказ иштиракунай хейлин дишегьлийрив гьуьрметдин грамотаяр, чухсагъулдин чарар вахкана. Абурун арада Абдул Саидован тIварунихъ галай Эминхуьруьн юкьван школадин сифтегьан классрин муаллим Мирзоева Жейран Аслановнани авай.

Дагъустан Республикадин милли­ по­литикадин ва динрин крарин рекья­й министерстводин Чухсагъулдин чар Ж. Мир­зоевадив СтIал Сулейманан рай­он­дин кьил Саид Темирханова ва минис­терстводин векил Заур Уружева вахкана.

И йикъара школадиз фейила, зал Ж. Мирзоева ва мад са шумуд муаллим гьалтна: Жамила Жигерова, Румина Рамазанова, Залина Исмаилова ва масабур.

— За, жуван уьмуьрдин пеше яз, му­аллимвал хкягъунихъ ихьтин себебар ава, — башламишна вичин ихтилат кIелунин рекьяй школадин директордин заместитель Румина Рамазановади. — Сад лагьайди, и пеше заз школада кIелзавай йисарилай бегенмиш я. Кьвед лагьайди, зи буба Къарабег Кьасумович ва диде Зарбаф Къагьримановна кIвалахдин гзаф йисарин тежриба авай муаллимар, педагогикадин ветеранар я. Пуд лагьайди, заз сифтегьан классра Жейран Аслановна хьтин дерин чирвилер авай, пешедал рикI алай муаллимди тарсар гана. Къе жуван муаллимдихъ галаз са школада кIвалахунал за шадвалзава.

Ихьтин келимаяр ван хьайила, жур­налистдизни шад жезва. ГьикI лагьай­тIа, Жейран муаллим адан аялрин ва хтулрин сифтегьан классрин муаллимни хьайиди я.

Ж. Мирзоевадин ери-бине Дербент шегьердай я. Ам ракьун рекьерин рабочий ва машинистдин куьмекчи яз яргъал йисара кIвалахай Аслан ва гамарин устад Гуьлселем Идрисоврин хизанда дидедиз хьана. 4 рушни 3 гада авай чIехи ва гьуьрметлу хизанда ада хъсан тербия къачуна.

Къадим шегьердин Макаренкодин тIварунихъ галай 9-нумрадин юкьван школада 8-класс акьалтIарай Ж. Мирзоева (Идрисова) Дербентдин пед­учи­лищедик экечIна. 1980-йисуз анин сифтегьан классрин муаллимрин отделение лап хъсан къиметар аваз акьалтIарна.

Педучилище акьалтIарай йисуз Жей­­рана ва Эминхуьряй тир жегьил му­аллим Мурад Мирзоева чпин сирер сад авуна, хизан кутуна.

— Зи юлдашдин буба Исабала Гьажибалаевични педагог тир. Ада дагъдин Ялцугърин ва гуьгъуьнлай Алами­шедин (Эминхуьруьн) школайра яр­­гъал йисара муаллимвиле, завучвиле, директорвиле кIвалахна. Адан стха Сергейни РД-дин лайихлу муаллим тир. Ихьтин хизандиз аватуни заз кIвалахда вилик физ куьмек гана, — лугьузва Жейран Аслановнади.

Са йисуз Саратов шегьерда муаллимвал авур Ж. Мирзоевади 1982-йиса­лай инихъ, чна винидихъ къейд авур- ­вал, Эминхуьруьн юкьван школада­ сиф­тегьан классрин муаллимвиле кIва­лах­зава. Бегьерлудаказ, агалкьунар аваз.

— Зун школадиз 1-классдиз атай вахт, Жейран Аслановнади сифтегьан классра гайи тарсар, адан насигьатар­ къени зи рикIел алама, — къейдзава­ школадин сифтегьан классрин муаллим, 4-классдиз регьбервал гузвай За­лина Исмаиловади. — Мектебдиз кIва­лахал атай сифте йикъарилай ада заз куьмекар гуз хьана. РикI алай муаллим заз гьар са карда чешне я.

Жейран муаллимдикай и цIарар кхьидайла, зи рикIел бубайрин багъманчи гьихьтинди ятIа, ада гьасилай емишрай чир жеда лугьудай мисал атана. Муал­лимдин «емишар» ада тарсар гана, чIе­хи хьана, чпикай хъсан пешекарар хьанвай виликан ученикар я. Эминхуьруьн юкьван школада 43 йисуз муаллимвиле намуслудаказ кIвалахзавай Жейран Аслановнадин виликан ученик­рикай къе чIехи дережайрин къуллугъчияр, муаллимар, инженерар, духтурар, юристар, экономистар ва маса пешекарар хьанва. Гзафбуру чпин рикI алай муаллимдихъ галаз сигъ алакъа хуьзва.

Жейран муаллим чешне хьана, шко­ла акьалтIарна, педучилищейрик ва институтрик экечIай, муаллимвилин пеше къачур гадайрин ва рушарин кьадарни тIимил туш. Жейран Аслановна­дин руш Людмиладини, Дербентдин пед­училище акьалтIарна, сифтегьан классрин муаллим яз кIвалахзава.

Жейран Мирзоевади тарсар гайи са шумуд руша ва гадади алай вахтун­да уьлкведин вузрани колледжра кIелзава.

Дагъустан Республикадин милли по­литикадин ва динрин крарин рекьяй министерстводин Чухсагъулдин чарчелай гъейри, тежрибалу муаллимдихъ ва насигьатчидихъ РД-дин илимдин ва образованидин министерстводин, райондин образованидин управленидин, школадин дирекциядин патайни грамотаяр ава. ИкI, яргъал йисарин намуслу­ зегьметдалди Жейран Аслановнади му­аллимрин, аялрин ва абурун диде-бу­байрин патай еке гьуьрмет къазанмишнава. Мадни агалкьунар хьурай вичихъ!

Хазран  Кьасумов