Украинада Россиядин Яракьлу Къуватри дяведин махсус серенжем кьиле тухузвай алай вахтунда ватанпересвилин мярекатар тешкилунихъ ва кьиле тухунихъ зурба метлеб ава. Россиядин Президент Владимир Путина къейд авурвал, «чи гележег мягькем бинедал эцигзавайди ватанпересвал я».

Москвада, «Спутник» базада Афгъанистанда интернациональный буржи кьилиз акъудай, Яру пайдах авай Псковдин мотострелковый 360-полкунин 85 йис тамам хьуниз талукьарнавай мярекат кьиле фена. Ана Россиядин субъектрай атанвай гьа полкуна къуллугъ авур женгинин юлдашри иштиракна.

Москвада кьиле фейи ватанпересвилин мярекатдин иштиракчийрин арада СтIал Сулейманан райондин афгъанвийрин отделенидин председатель, Дагъустан Республикадин куль­ту­радин лайихлу работник, райондин дяведин, зегьметдин­, Яракьлу Къуватрин ва къайдаяр хуьдай органрин советдин председатель Ризаев Ислеман Мевлидиновични авай. Чун адахъ галаз гуьруьшмиш хьана ва адавай са шумуд суалдиз жаваб гун тIалабна. 

– Ислеман Мевлидинович, чаз вуна сифтедай Москва­да кьиле фейи женгинин юлдашрин гуьруьшдикай суьгь­бетнайтIа кIанзавай.

- Псковдин мотострелковый 360-полкунихъ еке ва баркаллу тарих ава. Ам 1941-йисан 22-августдиз лишанчийрин (стрелковый) дивизия яз тешкилнай. Гуьгъуьнин йисара адакай кьилдин стрелковый 48-бригада, Горно-стрелковый дивизия, 1966-йисан 13-майдилай мотострелковый полк хьана. 1980-1982-йисара зани гьа полкуна къуллугънай.

1988-йисуз полк Афгъанистандай ахкъудна ва ам чукIурна, аскерар маса полкариз, частариз пайна. Полкунин чкадал «Бадахшан» тIвар алаз женгинин юлдашрин общественный организация тешкилнава. Адан членри сада-садахъ галаз чарарин ва электронный алакъа хуьзва.

Москвада чи гуьруьш 3 юкъуз давам хьана. Дагъустандай ана са за иштиракна. 44-45 йисалай женгинин юлдашар гьалт хъувун лап важиблу кар, чIехи бахт я. РикIел хкунар гзаф хьана.

– И кьадар йисар алатайлани, куьн сад-садаз чир хъхьанани?

- Вун чIалахъ тахьунни мумкин я, валлагь, гзафбур, акунмазди, чир хъхьана. Гьелбетда, йисари чпин кар ийизва, чун са кьадар яшариз акъатнава. Итижлу гуьруьшарни тахьана амукьнач. ИкI, Афгъанистанда чи ротадин командир хьайи капитан Пантюхин Александр Герасимович ва полкунин штабдин начальник хьайи полковник Нестеров Валерий Дмитриевич заз ва абуруз, зун, акунмазди, чир хъхьана. Алай вахтунда А. Пантюхин полковник, «Бадахшан» РООВ-дин регьбер, В. Нестеров генерал-майор, военный академияда преподаватель я. Абурухъ галаз за рикIел аламукьдай шикиларни яна, А. Пантюхина заз «В честь 85-летия формирования Кузбасско-Псковской Краснознаменной дивизии и празднования Дня 360-го отдельного мотострелкового Псковского Краснознаменного полка-приемника и продолжателя славных традиций дивизии» гафар кхьенвай вымпелни гана.

Зун Москвадиз, лугьудайвал, ичIи гъилди феначир. Гуьруьшдин мярекатдал зазни гаф гана. Анин иштиракчийриз за райондин кьил Саид Мусиновичан ва вири районэгьлийрин патай чими саламар лагьана. Афгъанистандин женгинин гьерекатрин ветеранриз, СВО-дин иштиракчийриз ва абурун хизанриз талукь яз кьилди районда ва санлай республикада тухузвай зурба кIвалахрикай гегьенш рахунар авуна. Ял ядай, ачух гуьруьшрин вахтунда мярекатдин иштиракчийри за гваз фенвай лезги чилин няметар, хьран ва тIанурдин фу, мижеяр дадмишна. Абурун разивал акурла, закни дамахдин гьиссер акатна.

Мярекатдин сергьятра аваз за жуван женгинин юлдашриз райондин 90 йис тамам хьунихъ галаз алакъалу яз акъуднавай «Край мыслителей и поэтов», «Афганистан – наша память и боль» ктабарни багъишна.

«Боевое содружество «Бадахшан» тешкилатдихъ, Александр Пантюхинахъ, Валерий Нестеровахъ ва маса «афгъан­вийрихъ» галаз за алакъа хуьзва. Женгинин юлдашар са чIа­вузни рикIелай алатдайди туш!

Хазран  Кьасумов