5-октябрдиз Махачкъалада РД-дин Гьукуматдин Председатель Абдулпатагь Амирханован регьбервилик кваз республика энергиядалди таъминарунин жигьетдай кардик квай штабдин заседание кьиле фена. “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, мярекат ачухдайла республикадин премьер-министрди эхиримжи йикъара тIебиатдин мишекъат шартIари агьалийрин яшайишдиз таъсирзавайди, бязи районра рекьер, алакъа къайдадикай хкатзавайди къейдна.
И крар фикирда кьуна, А.Амирханова тIебиатдин мишекъат шартIар себеб яз арадал атун мумкин тир татугай гьаларин нетижаяр энгел тавуна арадай акъудун патал са жерге ведомствойрал кIвалах къайдадик кутун тапшурмишна.
Гьавадин шартIар дегиш хьуникди (къати марфар къуникди) Къайтагъ,Тлярата, ЦIунти районра, Бежтадин участокда рекьер къайдадикай хкатна, алакъа квахьна, эквер хкахьна, бязи хуьрера газ хкудуниз мажбур хьана. Дагъустандин МЧС-дин кьил Нариман Къазимегьамедова, РД-дин энергетикадин ва ЖКХ-дин министр Ризван Мурадова хабар гайивал, и районра арадал атанвай гьаларин нетижаяр арадай акъудун патал махсус бригадайри кIвалах тухузва.
Заседанидин сергьятра аваз А.Амирханова пешекаррикай ибарат тир бригадаяр гьамиша гьазур яз хьун герек тирди къейдна. Ада гьакIни арадал атун мумкин тир гьаларикай, гьавадин шартIар чIур жедайдакай агьалийриз виликамаз хабар гунихъни еке метлеб авайди лагьана.
«Лезги газет»
