Дагъустандин милли сиясатдин ва динрин крарин рекьяй министрдин везифаяр вахтуналди тамамарзавайди яз Россиядин Игит Темирлан Абуталимов тайинарнава. Идакай саласа юкъуз Махачкъалада кьиле фейи совещанидал РД-дин Кьил Сергей Меликова хабар гана.
РикIел хкин, 2024-йисан майдилай Темирлан Абуталимова РФ-дин Президентдин «Время героев» программадин сад лагьай паюна иштиракзава. РД-дин Кьилин регьбервилик кваз Дагъустандин Кьилин ва Гьукуматдин Администрацияда цIийи министрди гьукумдин органра кIвалахунин жигьетдай вичин пешекарвал артухарна.
Темирлан Абуталимова гьукумдин органра кIвалахунин кьетIенвилер чирна, военный къуллугъчийрин мукьвабурухъ галаз кьиле фейи гуьруьшра иштиракна, жемиятдин тешкилатрихъ галаз алакъаяр хвена, кIвалахдин рекьяй тежриба гзафарун патал са жерге районриз мугьман хьана. Идалай гъейри, ада республикадин «Доблесть гор» программадин сергьятра аваз кьиле фейи мярекатар хъсан дережада аваз тешкилуник вичин пай кутуна.
Республикадин Кьили адаз жавабдар къуллугъ мубаракна ва адахъ еке агалкьунар хьун алхишна.
Къейд ийин хьи, Темирлан Умарович Абуталимов 1997-йисан 2-майдиз Хасавюрт райондин къумукьар яшамиш жезвай Темираул хуьре дидедиз хьана. Украинада кьиле физвай махсус серенжемдин иштиракчи, Россиядин Игит Т. Абуталимов кьве сеферда «Жуьрэтлувиляй» ва «Дагъустан Республикадин вилик лайихлувилерай» орденриз, «ВикIегьвиляй» медалдиз лайихлу хьана.
Виликдай РД-дин милли сиясатдин ва динрин крарин рекьяй министр яз кIвалахай Энрик Селимович Муслимов Дагъустандин Кьилин меслятчи яз тайинарнава. Сергей Меликова къейд авурвал, цIийи къуллугъдал ам Дагъустандин халкьарин арада садвал, стхавал хуьнин, руьгьдинни ахлакьдин, ватанпересвилин тербиядин месэлайриз талукь аналитикадин материалар гьазурунал машгъул жеда.
Агьмед Магьмудов
