Михьивал женнетдай атанвай затI я лугьудай мисал ава. Чун виринра михьивал хуьз алахъна кIанда. Гьайиф хьи, хейлин вахтара икI жезвач. Гзафбуру иллаки общественный чкайра михьивал хуьзвач. Ахцегьрин куьчейра ва маса чкайра михьивал таъминаруниз талукь макъалаяр чна газетриз тIимил гузвач. Амма и жигьетдай гьалар хъсанвилихъ дегиш жезвач. Себеб? И кардин важиблувал аннамиш тавун.
И месэла полициядин участковыйрини чпин гьар йикъан дикъетдик кутун лазим я. Алатай йикъара чун райцентрадин бязи куьчейриз килигна. Малум хьайивал райцентрада виридалайни чиркин чка 1-нумрадин школадин патав гвай КIелез кIам я. Инай гьар юкъуз школадиз ва аялрин бахчадиз хейлин инсанар физ — хквезва. Пис ниди басмишзавай чкадилай элячIуни гьар садан гуьгьуьлар чIурзава.
ЦРБ-диз къведай муькъуьн патавайни и кIамуз гьар жуьре зирзибил гадарнава. Кимел ацукьзавай бязи итимри ичкидин буш шуьшеярни вилик квай кIамуз гадарзава.
Михьивал хуьни гьар йикъан къайгъударвал истемишзава. Райцентрадин куьчеяр, кIамар ва маса чкаяр, са патахъай, михьзава, муькуь патахъай, чиркинарзава. Эдебсузвилелди зирзибил гадарзава, рекьера ятар твазва, тахсирлубурун гъил кьазвач. Себеб? Чи меденисузвиляй, къайгъусузвиляй.
Ихьтин са кардикайни лугьун. Уьшехънариз ва Гъуьйи кимин патав гвай магьледиз зирзибил тухудай автомашин къвезвач. Гьавиляй инин мукьварив яшамиш жезвай инсанри чархун муькъуьн кьве патахъайни вацIуз ва кьерез зирзибил гадарзава. И чкайрал гзаф абурсуз гьал атанва. И магьледин куьчейра зирзибил гадардай контейнерарни эцигнавач.
Эгер и чкаяр михьи тавуна амукьайтIа, инфекциядин гьар жуьредин азарарни пайда хьун мумкин я. Роспотребнадзордин къуллугъчийри и месэладиз фикир гана, серенжемар кьабулдайдак умуд кутазва.
Рагьидин Эминов
