РД-да карчийрин ихтиярар хуьнин рекьяй тамам ихтиярар ганвай векил Заур Къурбанов 3-майдиз Ахцегь райондин карчийрихъ галаз гуьруьшмиш хьана. Мярекат муниципалитетдин кьилин заместитель Мегьамед-Рауф Гъаниева ачухна ва кьилени тухвана.
Райадминистрациядин экономикадин отделдин начальник Радик Эфендиева къейд авурвал, Ахцегь районда гъвечIи ва юкьван бизнесдиз пешекарвилин рекьяй меслятар къалурун, гьакI финансрин куьмекар гун патал муниципальный махсус программа кьабулнава. Районда гъвечIи бизнесдин хиле 105 карханади ва 324 карчиди кIвалахзава. Чебни асул гьисабдай хуьруьн майишатдин суьрсет гьасилунал, алишверишдал, жемятдиз эцигунрин кIвалахар авунал ва гьар жуьре маса къуллугъар тамамарунал машгъул я. 2016-йисуз абурун бизнесди райондин бюджетдиз 3 миллионни 800 агъзур манат налогрин пул гъана. Шаз жуьреба-жуьре себебрикди, бизнесдай 60 карчи экъечIнатIа, чна 80 кас цIийи карчияр регистрация авуна. Им районда карчивал вилик физва лагьай чIал я.
Райондин карчийрин Союздин председатель, Заур Къурбанован общественный куьмекчи Нажмудин Нурагьмедов вичин рахунра чкадин карчияр расалмиш жезвай четинвилерал акъвазна. “Авайвал лагьайтIа, чахъ авайди ихтиярар ваъ, анжах мажбурнамаяр я. Самур дередин пуд райондин 60 агъзурдалай артух агьалийриз са банк кьванни тунвач. Налогар гун патал чун и четин рекьерай Мегьарамдхуьруьз ва я Дербентдиз финиз мажбур жезва. Анрани, нубатра югъ кьена, кар я туькIуьн, я туькIуьн тийин. Мукьвал-мукьвал къвез, инжиклу ийизвай гьар жуьре ахтармишунарни куьтягь жезвайди туш…”,- къейдна ада.
Мярекатдал мад хъвадай “Ахты” яд акъудзавай Бикир Мурсалов, райсобранидин председатель Абдулкерим Палчаев ва маса ксар рахана.
Заур Къурбанова чкадин карчийриз бизнес вилик тухуниз талукь къиметлу меслятар къалурна ва абурун суалриз жавабар гана.
Дашдемир Шерифалиев
