Дагъустанда АПК-дин хел патал кIвалахдайбур гьазурун ва зегьметчияр и хилез желб авун патал 293 миллион манат пул чара ийида. Идакай ТАСС-диз РД-дин Гьукуматдин Председатель Абдулмуслим Абдулмуслимова хабар гана.
Чешмедин малуматралди, пулдин такьатар федеральный дережадин «Кадры в АПК» проектдин гьисабдай ахъайда. Такьатрихъ ихьтин серенжемар кьиле тухудай фикирар ава: республикадин мектебра агроклассар арадал гъун ва абур герек алатралди таъминарун, ССУЗ-ра материально-технический гьалар пайгардик кутун, икьраррин бинедаллаз пешекарар гьазурун, муаллимар патал кIвалер эцигун ва я маса къачун.
Алай вахтунда Дагъустандин АПК-дин хиле кIвалахдайбурун кьитвал ава. Иллаки чубанар, дояркаяр, маларин духтурар, агрономар, зоотехникар ва технологар герек я. А.Абдулмуслимован гафаралди, республикадин кьилевайбур и месэладин къайгъуда ава ва ам гьялун патал федеральный дережадин проектра, программайра иштиракзава.
«Лезги газет»
