Месэла гьялун патал
Алатай гьафтедин эхирра Дагъустандин Гьукуматдин Председатель Мегьамед Рамазанов Къарабудахкент районда зирзибил гьялдай комплекс эцигзавай гьаларихъ галаз таниш хьана. Идакай «Лезги газетдиз» РД-дин Гьукуматдин пресс-къуллугъди хабар гана.
Къейд ийин хьи, зирзибилдин месэла Дагъустан патал хцибурукай сад яз амукьзава. Республикадин кьилевайбуру ам гьялун патал герек тир серенжемар кьабулзава. Зирзибил гьялдай цIийи карханаяр эцигун гьабурукай сад я. Къарабудахкент районда эцигзавай комплексдихъ йиса 500 агъзур тонндив агакьна зирзибил гьялдай гужлувал жеда ва ада Махачкъала, Каспийск шегьерриз, патарив гвай са жерге муниципалитетриз къуллугъда.
Премьер-министрди вичин телеграм-каналда хабар гайивал, объект планда къалурнавай вахтунда ишлемишиз вахкуниз манийвал гайи бязи себебар хьана. Алай вахтунда кархана эцигунин кIвалахрин 89 процент кьилиз акъуднава. Вилик инженерный сетар, цIаяр кьуниз аксивалдай къурулуш, вентиляция кардик кутун, рехъ туькIуьрун ва комплексдиз мукьва мулкар аваданлу авун кума.
М. Рамазанова объект вахтунда ишлемишиз вахкун патал вири къуватар желб авун важиблу тирди къейдна. И жигьетдай ада пудратчи карханадизни «РЭО» ООО-дин кьилевайбуруз тайин тапшуругъар гана.
Санлай къачурла, алай вахтунда республикада зирзибилдихъ галаз алакъалу инфраструктурадин ругуд объект эцигзава. Абур региондин Кьил Фёдор Щукинан гуьзчивилик ква.
«Чун патал неинки са карханаяр эцигун важиблу я, кар алайди республикада зирзибилдин месэла гьялиз куьмекдай къурулуш кардик кутун я. Гьелбетда, и кIвалах кьилиз акъудун патал вахт герек къведа. Гьавиляй гъилевай объектар эцигун чна кьетIен гуьзчивилик кутунва…», - лагьана РД-дин Гьукуматдин Председателди.
Агьмед Магьмудов