Гьуьрметлу инсанрикай

Дагъустан Республикадин Кьил Сергей­ Меликован Указдалди 2025-йисан 11-сентябрь Дагъустандин Халкьарин Садвилин йикъан сергьятра аваз, СтIал Сулейманан райондин собранидин депутат Ханбалаев Мурад Назимовичаз «За ми­лосердие и благодеяние» гьуьрметдин лишан гана.

СтIал Сулейманан райондиз камалэгь­лий­ринни арифдаррин, алимринни шаиррин рай­он гьахълудаказ лугьузва. Инаг тамам тухумралдини Дагъларин­ уьлкведа, адалай яргъарани машгьур я. Абурун арада чпин бинеяр Бутхуьряй тир Ханбалаеврин тухумди кьетIен чка кьазва. Жавабдар жуьреба-жуьре дережайрин регьберар, хъсан пешекарар, алимар, шабагьринни тIварарин сагьибар хьайи ва тир Ханбала, Играмудин, Улухан, Валентин, Надият, Маина, Альбина, Шефигъа, Елизавета, Исамудин, Назим, Максим… Ханбалаеври неинки хуьр, район, гьакI республикани машгьурна.

Чи къенин суьгьбетдин игит, машгьур тухумдин баркаллу крар давамарзавай кьегьал хва Мурад Ханбалаев еке гьуьрметдиз  лайихлу инсан я.

Райондин собранидин депутат Мурад Назимовича 2015-йисан сентябрдилай образованидин, культурадин ва спортдин хилера тереф хуьнин рекьяй регионрин прог­раммайрин мергьямат­лувилин «Иман» фондунин регьбер яз кIвалахзава. И фондуни райондин образованидин къурулуш вилик тухун, зигьин, бажарагъ авай школьник­ризни муаллимриз, СВО-дин иштиракчийрин ва тIимил таъмин хизанрай тир аялриз куьмекар гунин рекьяй еке кIвалах тухузва.

Мурад Назимовичани «Иман» фондуни­ къуьн кутуналди физикадинни математикадин илимрин доктор Заур Алисултанован тIвар­цIихъ — физикадай, Дагъус­тан­дин гос­университетдин куьмекдалди ма­тематикадин­ ва компьютеррин илимдин­, урус чIалай районрин уртах олимпиадаяр кьиле ту­хун хъсан адетдиз элкъвенва. Олимпиадайра СтIал Су­лейманан хьиз, Мегьарамдхуьруьн, Ахцегь, Докъузпара, Кьурагь ва Хив районрин­ школайра кIелзавайбуруни иштиракзава. КIвен­кIвечи чкаяр кьур аялриз ва абурун муаллимриз «Иман» фондуни пулдин пишкешар гузва.

2025-2026-кIелунин йисан вилик, алатай йисара хьиз, «Иман» фондунин куьмекни галаз Мурад Ханбалаева районда «Помоги соб­раться в школу» зурба­ серенжем кьиле тухвана. СВО-дин иштиракчийрин хизанрай тир, дяведин гьерекатар кьиле физвай мулкарай хканвай, гьакIни тIимил таъмин хизанрай 200-далай виниз аялриз пулдин такьатар, школада герек затIар гана.

Вирироссиядин, республикадин, муниципальный олимпиадайра гъалиб хьайи ва кIвенкIвечи чкаяр кьур аялризни абур гьазурай муаллимриз «Иман» фондунин патай пулдин пишкешар ва савкьатар гунни районда адетдиз элкъвенва.

Мадни кьетIендаказ къейд ийиз кIанза­вай кар ам я хьи, фондуни ва Ханбалаеврин хизанди пулунин такьатар чара авунин нетижада  райондин школайри дидед чIа­лан ктабар маса къачуна.

«Иман» фондунин пулунин такьатрин гьисабдай Бутхуьре 60 чкадин школа-бахча эцигун патал проектдинни сметадин документация туькIуьрнава. Объект эцигуниз гос­экспертизадини разивал ганва.

Образованидин хел вилик тухунай, зигьин ва бажарагъ авай аялризни муаллимриз куьмекар гунай, мергьяматлувилин кIва­лах­дай Мурад Назимовичаз Дагъус­тан Рес­публикадин Гьуьрметдин грамотани ганва.

Мурад Ханбалаеван инсанвилин ерийрикай, ада тамамарзавай мергьяматлувилин кIвалахрикай чаз райондин собранидин председатель Штибег Мегьамедханова, общественный палатадин председатель Алимет Мейланова, Да­гъустандин халкьдин ша­ир, культурадин управленидин начальник Майрудин Бабаханова, райондин обра­зованидин отделдин начальник Гьуьсейн Шихбабаева ва гзаф масабуру разивилин келимаяр лагьана.

РикI михьи, хайи район, халкь патал баркаллу гзаф кIвалахар авур ва мадни авун фикирдик квай Мурад Назимович вуж ятIа, гзафбуруз хъсандиз чизва. ЯтIани, заз агъадихъ адан уьмуьрдин ва зегьметдин рекьерикай куьрелди суьгьбет ийиз кIанзава.

Мурад Ханбалаев 1969-йисуз Махач­къа­ла шегьерда дидедиз хьана. 1986-­ 1992-йиса­ра ада Дагъустандин хуьруьн­ ма­­йишат­дин­­ институтдин меха­ни­зация­­­дин факультетда­ кIелна, армиядин­ жер­гейра­ къуллугъ­на. Гуьгъуьнлай ада «Даг­агропромпроект»­ институтдин 2-нумрадин­ яратмишун­рин­ мастерскойда ин­же­­нер-ме­ханик (1992-1996-йисара)­, и ин­сти­тутдин­­ яратмишунрин 1-мас­тер­­ской­да кьилин­ пе­ше­­кар-технолог (1996-2000-йи­са­ра) яз, «Ка­сумкентская» МТС-дин дирек­тор­виле­­ (2000-2007-йисара)­, мад «Дагагропромпро­ект» институтдин яратмишунрин 5-мастер­скойда кьилин пе­ше­кар-тех­но­логвиле кIва­лахна.

Агалкьунриз, пешекарвилин рекьяй авай чирвилериз килигна, Мурад Ханбалаев 2010-йисан майдиз Дагъустан Республикадин транспортдин рекьяй комитетдин председателдин заместителвиле, 2013-йисан мартдиз РД-дин транспортдин ва рекьерин майишатдин министрдин заместителвиле тайинарна. Жавабдар и везифаярни  Мурад Назимовича баркалла алаз кьилиз акъудна.

«Инсандик гьикьван регьимлувал ква­­тIа, адаз гьакьван уьмуьрни ава», — ла­гьанай­ Р. Эмерсона. Мергьяматлувиляй, ре­гьим­лувиляй, хъсан крарай ганвай гьуьр­метдин лишан мубарак авуналди, чаз Мурад Назимовичахъ мягькем сагъламвал, яргъал йи­сарин уьмуьр, хизанда хушбахтлувал, кIвалахдани мадни еке агалкьунар хьана кIанзава.

Хазран Кьасумов