ЧIехи Гъалибвилин 80 йисан сергьятра аваз Махачкъалада кIвалахдин рекьяй везифаяр тамамардайла телеф хьайи журналистрин тIварцIихъ янавай Аллеяда къелемар цуниз талукьарнавай серенжем кьиле фена. РД-дин Кьил Сергей Меликован тапшуругъдалди и серенжем Вирироссиядин «Аллея Доблести и Славы журналистов, погибших при исполнении служебного долга» проектдин сергьятра аваз, РД-дин информациядин ва печатдин Агентстводин регьбердин меслятчи, РФ-дин журналистрин Союздин Дагъустандин отделенидин ревизиядин комиссиядин председатель Мурад Мегьамедкеримова тешкилнавай.
Телеф хьанвай дагъустанви журналистрин экуь къаматдиз бахшнавай къелемар цунин мярекатда журналистри, жемиятдин векилри ва масабуру иштиракна. Санлай Аллеяда 23 къелем цана.
РФ-дин журналистрин Союздин Дагъустандин отделенидин председатель, «Лезги газетдин» кьилин редактор Мегьамед Ибрагьимова, серенжемдин гьакъиндай вичин фикирар лугьудайла, къейд авурвал, и мярекатди нубатдин сеферда гафунин азадвал ва гьахъвал патал чанар къурбанд авур журналистар халкьдин рикIера амайди къалурна. Ада гьакIни серенжем тешкилун, къелемар маса къачун патал пулдин такьатар чара авунай Мурад Мегьамедкеримоваз сагърай лагьана.
* * *
ЧIехи Гъалибвилин 80 йисан сергьятра аваз, РД-дин информациядин ва печатдин Агентстводин регьбердин меслятчи Мурад Мегьамедкеримова мад са мярекат тешкилна: Украинада кьиле физвай махсус серенжемда иштиракзавай дагъустанвийрин мукьвабур тир, республикадин жуьреба-жуьре СМИ-ра кIвалахзавай 26 касдив пулдин пишкешарни рикIел аламукьдай савкьатар вахкана.
И кардиз талукьарнавай гуьруьшда РД-дин информациядин ва печатдин Агентстводин регьбер Арсен Юсупова, адан меслятчи Мурад Мегьамедкеримова, «Лезги газетдин» кьилин редактор Мегьамед Ибрагьимова ва масабуру иштиракна.
«СВО-да иштиракзавай дагъустанвийри халис кьегьалвилер къалурзава. Абурун хизанрин, мукьва-кьилийрин гьакъиндай къайгъударвал авун чи виридан умуми буржи я. Дагъустандин СМИ-рин редакцийра абурун мукьва-кьилийри кIвалахзава. ЧIехи Гъалибвилин 80 йисан сергьятра аваз, и гуьруьш тешкилуни нубатдин сеферда чун куь къуллугъда акъвазнавайди, квехъ авай месэлаяр, дердияр чибурни тирди къалурзава», — лагьана А. Юсупова, мярекатдин иштиракчийрихъ элкъвена. Ада гьакIни и гуьруьш тешкилун, СВО-дин иштиракчийрин мукьвабуруз пишкешар гун вичин хивез къачунай Мурад Мегьамедкеримован тIварцIихъ разивилин келимаяр лагьана.
* * *
«Лезги газетдин» редакциядин коллективди чи вафалу амадаг, кIеви дуст, хайи чIалал акъатзавай газетдин тираж артух хьуник гьар йисуз вичин пай кутазвай кьегьал ватанэгьли Мурад Федриянович Мегьамедкеримоваз ам РД-дин информациядин ва печатдин Агентстводин регьбердин меслятчи яз тайинарун мубаракзава ва адахъ чандин сагъвал, мадни еке агалкьунар хьун алхишзава.
Агьмед Магьмудов
