«Ахцегь  район» муниципалитетдин кьил Абдул-Керим Палчаеван тапшуругъдалди 25-мартдиз Ахцегьа, Абдулжалил Идрисован тIварунихъ галай куьчедин къерехда, «Лацу верхьи тарарин аллея» кутунин мел тешкилна. Серенжем ЧIехи Гъалибвилин 80 йисан юбилейдиз ва СВО-да иштиракзавай районэгьлийриз талукьарна. Мергьяматлувилин зегьметдин лишанлу мярекатда райадминистрациядин кьилин куьмекчи Фиридин Магьмудован ва «Ахты» спорткомплексдин директор Сердер Моллалиеван гуьзчивилик кваз райондин идарайринни карханайрин 50-далай виниз къуллугъчийри гуьгьуьллувилелди иштиракна.

Лацу верхьи тарари кьерен участокда хъсандиз чил кьун патал трактордалди гегьенш фурар эгъуьнна, анра гъанвай­ миян накьв туна, анжах ахпа тарар цана. Санлай рекьин къерехдин цIийи аллеяда лацу верхьи 90 тар акIурна, абурук­ даяхар кутуна, яд гана. Лишанлу серенжемда иллаки А. Гъаниеван, Э. Шагьмарданован тIварарихъ галай спортшколайрин, «Ахты» спорткомплексдин, гьакI Ахцегьрин 1, 2 ва 3-нумрайрин СОШ-рин, футболдин «Ахцагь» командадин коллективар тафаватлу хьана.

Надир тарар, зегьмет чIугуна, цана. Гила кар алайди, абур хъсандиз еке хьун патал, жавабдар са кас галкIурна, маларикай хуьн патал жугъунра тун ва вахт-вахтунда яд гун я.

Дашдемир Шерифалиев